Read Twi Asante Hiob 15 Bible Online

Hiob 15 - Twi Asante bible

Hiob 15

¹Ɛnna Temanni Elifas buaa sɛ:

²Onyansafoɔ de nimdeɛ huuhuu bɛbua, na ɔde apueeɛ mframa ahyɛ n’afuru ma anaa?

³Ɔde nsɛm a ɛmfra bɛyi atɛn ne nsɛnkeka a mfasoɔ nni mu anaa?

⁴Nso woto nyamesuro twene, na wosi Nyankopɔn anim nsusuiɛ ho kwan.

⁵Na w’ano nsɛm kyerɛ wo bɔne, na woafa aniteɛ tɛkyerɛma.

⁶Wo ara w’ano na ɛbu wo fɔ, na ɛnyɛ me, aane, wo ara ankasa w’ano na ɛdi adanseɛ tia woɔ.

⁷Wone deɛ ɔdi kan a wɔwoo no onipa, na wɔnyinsɛn wo ansa na wɔreyɛ nkokoɔ?

⁸ Wokɔtiee Nyankopɔn agyinatuo, na woasi nyansa ano afa?

⁹ Ɛdeɛn na wonim a yɛnnim, na wohunu mu a ɛnni yɛn nkyɛn?

¹⁰Hwɛ, wafu dwono ne akɔkoraa wɔ yɛn mu, deɛ ɔsene w’agya panin mpo.

¹¹Nyankopɔn awerɛkyekyerɛ ne n’asɛm a wɔne woka no brɛɛ no sua w’ani so anaa?

¹²Adɛn na w’akoma twe wo korɔ, na adɛn na w’ani pa anyinam,

¹³na wodane wo honhom tia Onyankopɔn na woma nsɛnkeka firi w’anomu?

¹⁴ Hwan ne ɔdasani a ne ho bɛteɛ ne deɛ ɔbaa awo no a ɔtene?

¹⁵ Hwɛ, n’akronkronfoɔ so mpo ɔmfa ne ho nto, na ɔsoro ho nso nte n’ani so:

¹⁶Na nkantom deɛ ne ho yɛ nwunu na waporɔ, onipa a ɔnom amumuyɛ sɛ nsuo!

¹⁷Mɛkyerɛ wo, na tie me; na deɛ mahunu yi, mɛka akyerɛ wo.

¹⁸Deɛ anyansafoɔ aka akyerɛ na wɔansi so firi wɔn agyanom berɛ soɔ;

¹⁹wɔn nko na wɔde asase no maa wɔn, na ɔhɔhoɔ biara antwam wɔn mu.

²⁰ Ɔbɔnefoɔ ho yera no, ne nna nyinaa, na wɔde mfeɛ a wɔakan asie otirimuɔdenfoɔ.

²¹Ehu nkateɛ gyegye n’aso mu, asomdwoeɛ mpo mu na ɔsɛefoɔ ba ne soɔ.

²²Ɔnnye nni sɛ ɔbɛsane afiri sum mu, na wɔayi no ama afena.

²³Ɔkyini hwehwɛ aduane, ka sɛ: Ɛhe na ɛwɔ? Ɔnim sɛ esum da abɛn no.

²⁴Ahohiahia ne ahokyere yi no hu, ɛtintim no sɛ ɔhene a wasiesie ne ho ama ɔko a ɛyɛ hu.

²⁵Ɛfiri sɛ watene ne nsa atia Onyankopɔn, na wate Otumfoɔ so atua.

²⁶Ɔde kɔn a asene ato aba ne so, ne n’akyɛm akyi apɔapɔ a emu yɛ duro no;

²⁷ ɛfiri sɛ wama ne sradeɛ akata n’anim, na wama ne mfe mu adɔre sradeɛ,

²⁸ na wakɔtena nkuro a aguo so, afie a obi nte mu na wɔahyɛ sɛ ɛnyɛ afituo mu:

²⁹Ɔrennya ne ho, na n’adedodoɔ nso rennyina, na ne nnɔbaeɛ renkonkom mma fam;

³⁰Ɔremfiri sum mu mfi, ogyaframa bɛma ne nnuaban adwan, na n’anomu mframa bɛpra ne nhyerɛne akɔ;

³¹mma no mmfa ne ho nnto ahuhudeɛ so nnnaadaa ne ho, na ahuhudeɛ ara na ɛbɛyɛ n’akatua.

³²Ne da nnya nnuruiɛ no na akatua no bɛba, na ne duban renyɛ frɔmfrɔm;

³³ɔbɛpore n’asia abunu sɛ obobe deɛ, na wawoso ne nhyerɛne agu sɛ ngodua deɛ;

³⁴na abɔnefoɔ fekuo bɛyɛ abonini, na ogya bɛhye adanmudegyeɛ ntomadan.

³⁵ Wɔnyinsɛn ɔhaw, na wɔwo mmusuo, na wɔn yafunu siesie nnaadaa.