Read Twi Asante Hiob 16 Bible Online

Hiob 16 - Twi Asante bible

Hiob 16

¹Na Hiob gyee so sɛ:

²Mate saa nsɛm a ɛte sɛɛ bebree; mo nyinaa moyɛ gyamserefoɔ.

³Nsɛnhuuhuu yi awieeɛ nie? Anaasɛ ɛdeɛn na ɛhwanyan wo ma wobua?

⁴ Sɛ mowɔ me tebea mu a, anka me nso mɛkasa sɛ mo, anka mɛhɔre nsɛm magu mo so, na mawoso me ti magu mo so;

⁵aane, anka mede m’ano bɛhyɛ mo den, na m’anomu duema ama mo yea aboto.

⁶Sɛ mekasa a, me yea no mmoto, na sɛ megyae nso a, ɛdeɛn na ɛfiri me ho korɔ?

⁷Na afei deɛ, Onyankopɔn ahodwo me; woama me ho nnipa nyinaa agu;

⁸woapompono me ama no adane adanseɛ, na me fɔn asɔre atia me atoto m’ano wɔ m’anim.

⁹ Wasunsuane me n’abufuo mu, na ɔtaa me; ɔtwɛre ne se gu me so. M’ahohiahiafoɔ no pɔkyere n’ani hwɛ me.

¹⁰ Wɔhaahaa wɔn anomu tia me, wɔde ahohorabɔ bobɔ m’aso mu, wɔn nyinaa boaboa wɔn ano tia me.

¹¹Onyankopɔn ayi me ahyɛ abusufoɔ nsa, na wasum me ato abɔnefoɔ nsam.

¹² Anka medi yie, na ɔbubuu me. Ɔsɔɔ me kɔn na ɔbubuu me pasaa, na ɔde me sii hɔ yɛɛ ne botaeɛ;

¹³n’agyan dii me so ntwaguo, ɔpaee me sawa mu, na wannodo ho, ɔhwiee me bɔnwoma guu fam;

¹⁴Ɔbubuu me mprɛ bebree, ɔto baa me so sɛ ɔdɔmmanin.

¹⁵ Mepam ayitoma mekataa me wedeɛ so, na mede m’ahoɔden too mfuturo mu.

¹⁶Esu nti m’ani abere kɔkɔkɔkɔ, na owuo sunsum da m’anisuatɛtɛ so.

¹⁷Nanso amim biara nni me nsam, na me mpaebɔ ho te.

¹⁸ O! Asase, nkata me mogya so, na mma me sufrɛ nnnya homebea!

¹⁹Seesei mpo, hwɛ, ɔsoro na me danseni wɔ, na me dimafoɔ wɔ deɛ ɛkorɔn.

²⁰ Me nnamfo mpo di me ho fɛw, nanso Onyankopɔn na m’ani porepore nisuo ma no.

²¹Sɛ ɔnni mma onipa wɔ Nyankopɔn anim, sɛdeɛ onipa ba di ma ne yɔnko no.

²² Na mfeɛ a ɛwɔ ano no bɛdu na makɔ kwan a merensane memma.