Read Twi Asante Hiob 22 Bible Online

Hiob 22 - Twi Asante bible

Hiob 22

¹Ɛnna Temanni Elifas buaa sɛ:

²Ɔdasani bi bɛtumi adi mu wɔ Onyankopɔn anim anaa? Hwɛ, onimdefoɔ mpo, ɔdi mu wɔ n’ankasa n’ani so.

³Otumfoɔ nya ho biribi sɛ wotene, anaasɛ ɔnya mfasoɔ sɛ w’akwan di mu?

⁴Wo suro nti na ɔbɛka w’anim, na ɔde wo akɔ atemmuo mu anaa?

⁵Ɛnyɛ sɛ wo bɔne dɔɔso? Na w’amumuyɛ nni awieeɛ.

⁶ Sɛ woagye wo nuanom awowa ɔkwa, na woapa adagyafoɔ ho ntoma.

⁷ Woamma opititɔfoɔ nsuo annom, na woakame deɛ ɔdi kɔm aduane.

⁸Na onipa a ne basa mu yɛ den no, ɔno na asase wɔ no, na deɛ ɔwɔ animuonyam no na ɔtena soɔ.

⁹ Woama mmaa akunafoɔ de nsapan kɔ, na nwisiaa abasa nso, wɔabubu.

¹⁰Enti na afidie atwa wo ho ahyia, na nketenkete yi wo hu mpofirim.

¹¹Anaasɛ wonhunu sum ne nsuo pii a akata wo soɔ?

¹²Ɛnyɛ ɔsoro korɔn mu na Onyankopɔn wɔ? Na hwɛ nsoromma a ɛwɔ sorosoro no sɛdeɛ ɛkorɔn fa!

¹³Na woka sɛ: Ɛdeɛn na Onyankopɔn nim? Esum kabii akyiri nohoa na ɔbɛbu atɛn?

¹⁴Mununkum yɛ no nkataho, na ɔnhunu adeɛ, na ɔsoro kɔntɔnkrɔn so na ɔnanteɛ.

¹⁵Wobɛfa tete tempɔn no a mma busufoɔ nantee soɔ no so anaa?

¹⁶ Wɔn a wɔpraa wɔn kɔeɛ ansa na ɛberɛ reduro, na wɔn nnyinasoɔ sene kɔɔ sɛ asuo no.

¹⁷ Wɔn na wɔka kyerɛɛ Onyankopɔn sɛ: Firi yɛn so! Na ɛdeɛn nso na Otumfoɔ bɛyɛ wɔn?

¹⁸ Nanso ɔde nnepa hyehyɛɛ wɔn afie amaama na abɔnefoɔ agyinatuo mpare me!

¹⁹ Ateneneefoɔ hunu, na wɔn ani gye; na deɛ ɔdi bem no di wɔn ho fɛw,

²⁰ka sɛ: Ampa ara, wɔn a wɔsɔre tiaa yɛn no ayera, na wɔn nnikaeɛ no, ogya ahye!

²¹Fa wo ho bɔ Nyankopɔn ho ɛ, na wo ho nnwo wo; yei mu na adepa bɛba ama woɔ.

²²Gye n’anomu mmara, na fa ne nsɛm sie w’akomam.

²³ Sɛ wosane kɔ Otumfoɔ nkyɛn a, wɔde wo bɛsi hɔ, sɛ woyi wo ntomadan mu abusudeɛ kɔ akyirikyiri a, —

²⁴ fa sika amapa gu mfuturo mu, na Ofir sika nso, fa gu asubɔnten mu mmoseaa mu.

²⁵Na Otumfoɔ bɛyɛ wo sika amapa bebree ne dwetɛ a wɔahɔre ama woɔ.

²⁶ Ɛno na wo ho bɛsɛpɛ wo Otumfoɔ ho, na woama w’ani so akyerɛ Onyankopɔn.

²⁷ Wobɛsrɛ no, na watie wo, na w’aboadeɛ ka no, woatua.

²⁸Wobɛbɔ wo tirim, na ɛbɛgyina ama wo, na hann bɛhyerɛn w’akwan so.

²⁹ Sɛ wɔbrɛ wo ase a, ɛno deɛ, ahomasoɔ ntira. Ɛfiri sɛ ɔhobrɛaseni deɛ, ɔbɛma no adi yie.

³⁰ Sɛ deɛ ɔnnii bem mpo, ɔbɛgye no a, ɛnneɛ w’ahoteɛ so na wɔbɛgye wo.