Read Twi Asante Hiob 23 Bible Online

Hiob 23 - Twi Asante bible

Hiob 23

¹Na Hiob gyee so sɛ:

²Ɛnnɛ na m’abooboodie mu ayɛ den, na me pira ayɛ den asene m’apinisie.

³O, sɛ anka menya mehunu deɛ mɛhunu no, na mekɔduru ne tenaberɛ ɛ!

⁴Anka mɛsiesie n’anim asɛnnie, na mɛbisabisa no nsɛm ara yie.

⁵Anka mɛhunu nsɛm a ɔde bɛbua me, na mahunu deɛ ɔbɛka akyerɛ me no mu.

⁶Tumi dodoɔ na ɔde ne me bɛham anaa? Dabi, aso nko na ɔbɛyɛ ama me.

⁷Ɛhɔ na ɔteefoɔ ne no bɛyiyi no, na mafiri me temmufoɔ nsam korakora.

⁸Hwɛ, mekɔ m’anim, nso ɔnni hɔ, ne m’akyi, nso menhu no.

⁹Na ɔyɛ n’adeɛ benkum a, m’ani mmɔ no so, ɔmane nifa a, menhu no.

¹⁰ Na ɔnim kwan a mefa soɔ. Ɔsɔ me hwɛ a, mɛfiri mu sɛ sika mapa a wɔde afa ogya mu.

¹¹N’anammɔn mu na me nan tintimiiɛ, mahwɛ ne kwan, na mammane.

¹²N’anomu mmara, mamfiri ho, makora n’anomu nsɛm sene deɛ ɛhia me.

¹³Nso ɔno deɛ, ɔnsakyera da, na hwan na ɔbɛsane no? Na deɛ ɔpɛ, na ɔyɛ.

¹⁴Deɛ wahyɛ ama me na ɔbɛma no aba, na adeɛ a ɛte seyie pii na ɛwɔ ne tirim.

¹⁵Enti ehu ka me n’anim, medwene me tirim, na me ho popo wɔ ne ho.

¹⁶Na Onyankopɔn ama m’akoma abubu, na Otumfoɔ ayi me hu,

¹⁷ɛfiri sɛ manyera esum no mu, na wankata esum kabii no so m’anim.