Read Twi Asante Hiob 26 Bible Online

Hiob 26 - Twi Asante bible

Hiob 26

¹Na Hiob gyee so sɛ:

²Woaboa deɛ ɔnni tumi sɛn? Ɛdeɛn na woayɛ de agye basa a ɛnni ahoɔden?

³Afotuo bɛn na woatu deɛ ɔnni nyansa, na woaka nimdeɛsɛm pa a ɛdɔɔso anaa?

⁴Hwan na woaka nsɛm akyerɛ no, na hwan ahome na afiri wo mu yi?

⁵Nsamanfoɔ ho popo nsuo ne wɔn a wɔte mu no ase.

⁶ Asamando da adagya n’anim, na nkatasoɔ biara nni hɔ mma Ɔsɛeɛ Amena.

⁷Ɔno na ɔtrɛ ɔsoro a ɛbirie no mu ahunumu, na ɔde asase sɛne deɛ biribi nnie.

⁸ Ɔkyekyere nsuo hyɛ mununkum mu, na mununkum no mpae wɔ aseɛ.

⁹Ɔbram n’ahennwa anim de ne mununkum katakata ho.

¹⁰ Ɔtwa nsuo ani hyeɛ de kɔsi deɛ hann ne sum awieeɛ hyia hɔ.

¹¹Ɔsoro nnyinasoɔ hinhim, na wɔn ho dwiri wɔn, n’ateatea ano.

¹²Ɔde ne tumi nu ɛpo mu, na ɔde ne nhunumu brɛ Ɛpobɔpɔn[2] ase.

¹³ Ne honhom ano na ɔsoro teɛ, ne nsa na ɛhwire ɔwɔ a ne ho yɛ herɛ no mu.

¹⁴Hwɛ, yeinom ne n’akwan ano ano, na ɛho asomusɛm bi nko na yɛteɛ, na ne mmaninyɛ prannaa a ɛbom no, hwan na ɔbɛhunu mu?