Read Twi Asante Hiob 29 Bible Online

Hiob 29 - Twi Asante bible

Hiob 29

¹Na Hiob kɔɔ so maa n’abebusɛm so sɛ:

²O, sɛ anka mereyɛ sɛdeɛ na meteɛ akane abosome no, sɛ nna a Onyankopɔn hwɛɛ me soɔ no ɛ!

³ Berɛ a ne kanea hyerɛn m’atifi, na mede ne hann menantee sum mu no!

⁴ Sɛdeɛ na meteɛ wɔ me twaberɛ nna mu, berɛ a Nyankopɔn ayɔnkofa wɔ me ntomadan soɔ no;

⁵berɛ a Otumfoɔ ne me da so wɔ hɔ, na me mmɔfra nso atwa me ho ahyia,

⁶berɛ a me nan ho fɔɔ nufosuo mu sradeɛ mu, na abotan maa ngo asubɔnten senee me hɔ no.

⁷Mefiri adi mekɔ kuro pono ano, na mede m’adwa mesi mpraeɛ so a,

⁸mmeranteɛ hu me, na wɔhunta, na nkɔkoraa sɔre gyinagyina.

⁹Mmapɔmma gyae kasa, na wɔde wɔn nsa butu wɔn ano.

¹⁰Mmakoma nne taa dinn, na wɔn tɛkyerɛma fam wɔn dodom.

¹¹Na aso te a, ɛhyira me, na ani hu me a, ɛdi me adanseɛ.

¹² Ɛfiri sɛ na meyi ɔmanehunufoɔ a ɔsu frɛ ɔboafoɔ ne awisiaa a ɔnni boafoɔ.

¹³Deɛ ɔreyɛ ayera no nhyira ba me so, na mema ɔbaa kunafoɔ nya abotɔyam.

¹⁴Mefira tenenee na ɛfira me, m’atemmusɛm te sɛ atadeɛ yuu ne abotire:

¹⁵Meyɛɛ aniwa maa onifirani, na meyɛɛ ɛnan nso maa apakye;

¹⁶ meyɛɛ agya maa ahiafoɔ, na deɛ menni no no mpo asɛm, mehwehwɛ mu maa no;

¹⁷ na mebubuu omumuyɛfoɔ sebɔmmɔfoɔ, na mehwim fomfa adeɛ mefirii ne se mu.

¹⁸Na mekaa sɛ: Me pirebuo ara mu na mɛgyaa mu, na mama me nna adɔɔso sɛ anwea.

¹⁹Me nhini mu bɛbue ama nsuo, na obosuo nso atena me mman so.

²⁰M’animuonyam yɛ foforɔ ma me, na me tadua anya denyɛ foforɔ me nsam.

²¹Me na wɔtie me na wɔtwɛn me, na wɔyɛ komm tie m’afotuo;

²²me kasa akyi wɔnsane nkasa, na me nsɛm sosɔ gu wɔn so:

²³Na wɔtwɛn me sɛdeɛ wɔtwɛn osutorɔ, na wɔtrɛ wɔn anomu sɛdeɛ wɔde regye bereamporɔsuo.

²⁴Mesere mekyerɛ wɔn a anidasoɔ abɔ wɔn, na m’anim a ɛteɛ no, wɔmma no ngu ase.

²⁵Meyii wɔn kwan memaa wɔn, metenaa ase sɛ otitire, na metenaa hɔ sɛ ɔhene, asafo mu, sɛdeɛ ɔkyekyere abooboodifoɔ werɛ.