Read Twi Asante Hiob 34 Bible Online

Hiob 34 - Twi Asante bible

Hiob 34

¹Na Elihu toaa so sɛ:

²Anyansafoɔ, montie me nsɛm, na mo, animdefoɔ, monyɛ aso mma me.

³ Na aso na ɛsɔ nsɛm hwɛ, na ano ka aduane hwɛ.

⁴Yɛbɛsɔ atemmuo ahwɛ afa, na yɛahunu deɛ ɛyɛ yɛn ntam.

⁵ Na Hiob aka sɛ: Metene, nanso Onyankopɔn afa me bem kɔ.

⁶ Me bem mu ara na wɔbu me torofoɔ, m’agyan kuro mu ayɛ den, nanso mmarato nni me mu.

⁷ Ɔbarima bɛn na ɔte sɛ Hiob a ɔnom mmusubɔ sɛ nsuo,

⁸ na ɔhyɛne amumuyɛfoɔ ayɔnkofa mu, na ɔne nnipa abɔnefoɔ ananteɛ?

⁹ Na ɔka sɛ: Ɛnyɛ mfasoɔ mma onipa sɛ ɔne Onyankopɔn bɔ.

¹⁰Enti mo a mowɔ tire, montie me, ɛmpare Onyankopɔn sɛ ɔbɛdi asɛmmɔne, na Otumfoɔ bɛdi amumuyɛsɛm,

¹¹ na mmom, onipa nneyɛɛ so ka na ɔtua no, na sɛdeɛ obi kwan teɛ no, saa na ɔma no to no.

¹² Ampa ara, Onyankopɔn nni asɛmmɔne, na Otumfoɔ nkyea atemmuo.

¹³Hwan na ɔde asase hyɛɛ ne nsa, na hwan na ɔsiesiee wiase nyinaa?

¹⁴Sɛ ɔgye ne home fa na ɔtwe ne honhom ne n’ahome ba ne nkyɛn a,

¹⁵ anka honam nyinaa bɛgyaa mu prɛko, na onipa bɛsane akɔ dɔteɛ mu.

¹⁶Na sɛ wowɔ nhunumu a, tie yei, yɛ aso ma me nsɛm.

¹⁷Deɛ ɔkyiri atɛntenenee bɛnya aman adi so anaa? Anaasɛ wobɛbu ɔteneneeni tumfoɔ no fɔ?

¹⁸Deɛ ɔka kyerɛ ɔhene sɛ: Ohuhuni! Ne mmapɔmma sɛ: Abɔnefoɔ!

¹⁹Deɛ ɔnhwɛ atitire anim, na ɔmmu ɔdehyeɛ nsene mmɔborɔni; ɛfiri sɛ ne nsa ano adwuma ne wɔn nyinaa.

²⁰Mpofirim na wɔwuo, na adasuo mu na aman hinhim na wɔsene korɔ, na wɔpra aberempɔn kɔ, nso ɛnnam onipa nsa so.

²¹ Na n’ani wɔ onipa akwan so, na ɔhunu n’anammɔntutuo nyinaa.

²² Esum nni hɔ, na esum kabii nni hɔ, na amumuyɛfoɔ de wɔn ho ahunta hɔ.

²³Na ɛnhia sɛ ɔhwɛ onipa ma no kyɛ ansa na wakɔ Nyankopɔn nkyɛn, atemmuo mu.

²⁴Ɔbubu aberempɔn a ɔnhwehwɛ wɔn asɛm mu, na ɔde afoforɔ si wɔn ananmu.

²⁵Ɛno nti ɔhwɛ wɔn nneyɛɛ, na ɔbutu wɔn anadwo ma wɔdwerɛ wɔn.

²⁶Ɔhwe wɔn sɛ abɔnefoɔ ma nnipa nyinaa hunu.

²⁷Ɛfiri sɛ wɔmane firii n’akyiri kɔe, na wɔannwene n’akwan no biara ho,

²⁸ sɛ wɔbɛma mmɔborɔni sufrɛ aduru ne nkyɛn, na wate amanehunufoɔ sufrɛ.

²⁹Na sɛ ɔno na ɔma no dwo a, hwan na ɔbɛbu fɔ? Na ɔde n’ani hunta a, hwan na ɔbɛhu no? Ɔman mu so oo, ɔbaakofoɔ so oo, ɔyɛ no pɛ,

³⁰na onipa kɔnkɔnsani anni hene, na wɔansum ɔman fidie.

³¹Na obi bɛka akyerɛ Onyankopɔn sɛ: Mahunu amane, merenyɛ amumuyɛ bio,

³² deɛ mennya menhunuiɛ, wo na kyerɛ me, sɛ madi amumuyɛsɛm a, merenni bio?

³³Na worepo ne nneyɛɛ yi, ɔnhyɛ wo ananmu sɛdeɛ wopɛ anaa? Enti wo na ɛsɛ sɛ woyi, na ɛnyɛ me, na deɛ wonim no, ka ɛ!

³⁴Nnipa a wɔwɔ tire bɛka akyerɛ me, na ɔbarima nyansafoɔ bɛtie ama me,

³⁵ Hiob deɛ, ɛnyɛ nimdeɛ so na ɔkasa, na ne nsɛm mu nni nhunumu.

³⁶Sɛ anka wɔresɔ Hiob ahwɛ akɔsi awieeɛ ɛ, ɛfiri sɛ ne mmuaeɛ te sɛ amumuyɛfoɔ mmuaeɛ.

³⁷ Na ɔde mmusubɔ ka ne bɔne ho, yɛn mu mpo ɔbɔ ne nsam, na ɔma ne nsɛm a ɔne Onyankopɔn de di asie no dɔɔso.