Read Twi Asante Hiob 38 Bible Online

Hiob 38 - Twi Asante bible

Hiob 38

¹ Na AWURADE firi ahum no mu buaa Hiob sɛ:

² Hwan ne deɛ ɔbiri afotuo ani, nsɛm a emu nni nimdeɛ mu yi?

³ Bɔ w’asene sɛ ɔbarima ɛ, na memmisa wo, na kyerɛ me.

⁴Ɛhe na na wowɔ berɛ a metoo asase fapem? Sɛ wowɔ nhunumu a, ka ɛ!

⁵Hwan na ɔde ne nsusuiɛ too hɔ, wonim anaa? Anaasɛ hwan na ɔsaa so homa?

⁶Ɛdeɛn so na wɔde ne nnyinasoɔ siiɛ, anaa hwan na ɔde ne tweatiboɔ toeɛ,

⁷berɛ a adekyeeɛ nsoromma boom too ahurisie dwom, na Ɔsoro dɔm nyinaa bɔɔ ose no?

⁸Na hwan na ɔkaa ɛpo hyehyɛɛ apono mu, berɛ a ɛfiri asaseyam pueeɛ,

⁹na mede mununkum meyɛɛ ne nkataho, ne sum kabii nso meyɛɛ n’aboomu,

¹⁰ na metwaa ne so hyeɛ, na mesisii adaban ne apono,

¹¹ na mekaa sɛ: Ɛha yi na bra bɛduro, na ntra so, na ɛha ara na w’asorɔkyeɛ ahantan mmeso no?

¹²Ɛfiri wo nna mfitiaseɛ woahyɛ anɔpa so pɛn, woakyerɛ adekyeeɛ nso ne diberɛ,

¹³sɛ ɛnsɔ asase mmuano mu, na wɔmporepore abɔnefoɔ mfiri so?

¹⁴Sɛ ɛnnane sɛ daagyere nsɔano ase na ɛnyɛ sɛ atadeɛ a wɔahyɛ no aduro,

¹⁵na wɔde abɔnefoɔ hann akame wɔn, na nsa a wɔama soɔ no, wɔabu mu?

¹⁶Woakɔ ɛpo aniwa ho, na woanante bunu donkodonko ase?

¹⁷Wɔayi owuo aponkɛseɛ adi akyerɛ wo, anaasɛ woahunu esum kabii aboboɔ no?

¹⁸Woahunu asase trɛ mu anaa? Sɛ wonim ne nyinaa a, ka ɛ!

¹⁹Ɛhe na hann tenabea kwan wɔ, na esum nso, n’afa wɔ he?

²⁰Na wode akɔ ne hyeɛ so, na woahunu ne fie akwan no.

²¹Wonim, aane, ɛfiri sɛ saa berɛ no na wɔawo wo, na woadi nna bebree!

²²Woakɔ sukyerɛmma korabea, anaa woahunu asukɔtweaa akoradeɛ no,

²³ adeɛ a makora asie ahohiahia berɛ ne ɔko ne akodie da no?

²⁴Ɛhe na ɔkwan a hann nam so hyerɛnhyerɛn no wɔ, ne deɛ apueeɛ mframa fa so bɔ asase soɔ no nso wɔ?

²⁵ Hwan na ɔyiyi aka ma osuo ne ɔkwan ma aprannaa asraman no,

²⁶sɛ ɔbɛma osuo atɔ asase a obi nni hɔ soɔ, ne anwea pradada a onipa bi nni soɔ so,

²⁷na wama amamfo ne asase hunu ameeɛ, na wama wira a ɛfuo no afefɛ?

²⁸Osuo wɔ agya, anaasɛ hwan na ɔwo obosuo a ɛsosɔ?

²⁹ Hwan yam na nsuo nkyenkyeneeɛ fire, na ɔsoro bosuo a akyenkyen no, hwan na ɔwoeɛ?

³⁰Nsuo kyenkyen sɛ ɔboɔ, na ebunu donkodonko ani pam.

³¹ Wobɛtumi akyekyere Akokɔbaatan-ne-ne-mma homa mu, anaasɛ wobɛtumi asane Nwenwenente nhoma?

³²Wobɛtumi ayi Owiakwanmu nsoromma adi wɔ ne berɛ mu, anaasɛ wobɛtumi akyerɛ Sisire nsoromma ne ne mma kwan?

³³Wonim ɔsoro nhyehyɛɛ, anaa wobɛtumi ahyehyɛ sɛdeɛ ɛnni asase soɔ?

³⁴Woma wo nne so kɔ mununkum mu sɛ nsuo pii mmɛkata wo ho anaa?

³⁵Wobɛtumi asoma anyinam ama no akɔ, na aka akyerɛ wo sɛ: Yɛn nie! anaa?

³⁶Hwan na ɔde nyansa siee ayamdeɛ mu, anaasɛ hwan na ɔde nhunumu maa adwene?

³⁷ Hwan na ɔde nyansa kan mununkum, na ɔsoro nkotokuo no, hwan na ɔdane no

³⁸ma mfuturo pia kɔbɔ dosie, na dɔteɛ bɔ ntoantoa?

³⁹Wo na woyɛ ha ma gyatabereɛ nya nam, anaa woma agyataburuwa meeɛ,

⁴⁰ ɛberɛ a wɔbutubutu wɔn atu mu, na wɔtete adɔtɔ mu retɛ?

⁴¹ Hwan na ɔsiesie aduane ma anene, ɛberɛ a ne mma su frɛ Onyankopɔn, wɔkyini na wɔnni aduane no?