Read Twi Asante Hiob 39 Bible Online

Hiob 39 - Twi Asante bible

Hiob 39

¹Wonim abotan so mmirekyie awoɔ berɛ, na aforoteɛ awoko nso, wowɛn?

²Wokan abosome a wɔn afuru de nyini, na wonim berɛ a wɔde woɔ anaa?

³Wɔkoto wowo wɔn mma, wɔto wɔn awoɔyea twene,

⁴wɔn mma ho kokwa, wɔnyini wiram, wɔfiri kɔ, na wɔnsane mma wɔn nkyɛn.

⁵Hwan na ɔgyaa ɛserɛ so afunumu sɛ ɔnne ne ho, na afunumu prakaateni nhoma, hwan na ɔsane?

⁶Deɛ mede ɛserɛ pradada mayɛ ne fie, na mede nkyene asase ayɛ ne tenabea.

⁷Ɔmmu kuro mu gyegyeegyeyɛ, ɔnte ɔkafoɔ ateatea.

⁸Deɛ ɔnya no mmepɔ soɔ no ne n’aduane, na ɔpɛ adeɛ biara a ɛyɛ frɔmfrɔm.

⁹Okoo bɛpene sɛ ɔsom woɔ, anaasɛ ɔbɛtena w’adididaka ho?

¹⁰Wode homa bɛsa okoo, mfɛtɛeɛka ho, anaasɛ ɔbɛtwe mmonhwa mu mfɛtɛeɛ so adi w’akyi?

¹¹N’ahoɔden so nti, wode wo ho bɛto ne so, na woagya w’adwuma ama no anaa?

¹²Wobɛgye no adi sɛ ɔde w’aba bɛba, na waboa ano de aba w’asan so?

¹³Sohori bɔ ne ntaban mu ahurisidie mu, ɛne asukɔnkɔn ntaban ne ne ntakra na ɛsɛ anaa?

¹⁴Mmom ɔgya ne nkosua ma asase, na mfuturo so na ɔma ɛho dɔ,

¹⁵na ne werɛ firi sɛ ɛnan bɛpɛkyɛ, anaasɛ wiram mmoadoma bɛbobɔ.

¹⁶Ɔbɔ ne mma atirimuɔden sɛdeɛ wɔnyɛ ne deɛ, ne brɛ yɛ ɔkwa, nanso ɔnsuro,

¹⁷ɛfiri sɛ Onyankopɔn ama nyansa abɔ no, na wankyɛ no nhunumu.

¹⁸Na sɛ ɔyere ne ho tu a, ɔsere ɔpɔnkɔ ne ne sotefoɔ.

¹⁹Wo na wode ahoɔden ma ɔpɔnkɔ? Wo na wode nnawa hyehyɛ ne kɔn?

²⁰Wo na woma no huri sɛ ntutummɛ? Ne home foofoo denyɛ yɛ hu.

²¹Ɔwerɛwerɛ bonhwa mu, na ɔdi n’ahoɔden ho ahurisie, ɔfiri kɔhyia akofoɔ a wɔamia.

²²Ɔsere ehu, na ne ho mpopo, na ɔnsane mfiri afena anim.

²³Agyan boha woso ne so, pea ne pɛmɛ a ɛtwa nyinamnyinam nso.

²⁴Ɔde anibereɛ ne abufuo werɛwerɛ asase, na totorobɛnto hyɛne a, ɔnnyina bio.

²⁵Totorobɛnto hyɛne a, ɔka sɛ: Wiɛɛ! Na ɔte ɔko hwa wɔ akyirikyiri, asafohene nteam ne osebɔ no.

²⁶Wo nhunumu so na asansa nam tuo? Ɔtrɛ ne ntaban mu kyerɛ anafoɔ asase.

²⁷Anaasɛ w’anomu asɛm so na ɔkɔdeɛ ma ne ho soɔ, na ɔyɛ ne pirebuo deɛ ɛkorɔn?

²⁸Ɔbotan mu na ɔteɛ na ɔda, ɔbotan ano hwerɛmhwerɛm ne ahwɛeɛ sorɔnsorɔn so,

²⁹ɛhɔ na ɔfiri hwehwɛ aduane, n’ani hunu adeɛ akyirikyiri.

³⁰ Na ne mma fe mogya, na deɛ atɔfoɔ wɔ no, ɛhɔ na ɔwɔ.