Read Twi Asante Hiob 5 Bible Online

Hiob 5 - Twi Asante bible

Hiob 5

¹Frɛ ɛ, obi wɔ hɔ a ɔbɛbua woɔ? Na akronkronfoɔ mu hwan na wode bɛdan no?

²Na ahisɛm kum agyimifoɔ, na ninkuntwe kum atetekwaa.

³ Me deɛ, mahunu ogyimifoɔ a ɔgyee nhini, nanso amonom hɔ ara na medomee ne tenabea;

⁴ne mma ne nkwagyeɛ ntam twe, na wɔpɛkyɛ wɔn wɔ kuro pono mu a ɔgyefoɔ nni hɔ.

⁵Wɔn a wɔdi kɔm bɛdi ne nnɔbaeɛ, na nsɔeɛ mu mpo na wɔbɛfa, na adufudepɛfoɔ amene wɔn adedodoɔ.

⁶Ɛfiri sɛ mmusuo mfifiri mfiri mfuturo mu, na ɔhaw nso mfu mfiri fam.

⁷Na wɔwoo onipa maa ɔhaw, sɛ ogyaframa tutu kɔ soro no.

⁸Na me a, anka mɛhwehwɛ Nyankopɔn akyiri kwan, na mede m’asɛm mahyɛ ne nsa,

⁹ deɛ ɔyɛ ade kɛseɛ a ɛnni nhwehwɛmu, anwanwadeɛ nso a wɔntumi nkan.

¹⁰Deɛ ɔma osuo tɔ asase soɔ, na ɔma nsuo ba wira mu,

¹¹ ɔde ahobrɛasefoɔ tena deɛ ɛkorɔn, na ɔma abooboodifoɔ so kɔ yiedie mu.

¹²Ɔsɛe anitefoɔ atirimpɔ, na wɔn nsa antumi anyɛ adepa biara.

¹³ Ɔkyere anyansafoɔ wɔn aniteɛ mu, na ɔbutu akontonkyifoɔ agyina.

¹⁴ Wɔtɔ sum mu awia, na awia ketee wɔkeka sɛ anadwo.

¹⁵Na ɔgye ohiani firi afena a ɛfiri wɔn anomu no ano, ne ɔhoɔdenfoɔ nsam.

¹⁶Na mmɔborɔni nya anidasoɔ, na amumuyɛ mua n’ano.

¹⁷ Hwɛ, nhyira ne ɔdasani a Onyankopɔn ka n’anim, enti, mpo Otumfoɔ atenetene no.

¹⁸ Na ɔno na ɔpira, na ɔkyekyere soɔ, ɔpɛkyɛ, na ne nsa nso sa.

¹⁹ Ɔbɛyi wo afiri ahohiahia nsia mu, aane, na deɛ ɛtɔ so nson no mu, bɔne renka wo.

²⁰Ɛkɔm berɛ ɔbɛgye wo afiri owuo mu, na akodie mu nso wagye wo afiri afena ano.

²¹Ɔbɛkora wo afiri tɛkyerɛma mpire ano, na wɔrensuro sɛeɛ a ɛbɛba.

²²Wobɛsere sɛeɛ ne ɛkɔm, na asase so mmoadoma nso, worensuro wɔn.

²³ Ɛfiri sɛ wo ne wiram aboɔ mpo bɛyɛ apam, na wiram mmoadoma bɛdwo ama wo.

²⁴Na wobɛhunu sɛ wo ntomadan si hɔ dwoodwoo, na wohwɛ wo tenabea a, worenhunu sɛ atɔ mu.

²⁵Na wobɛhunu nso sɛ w’asefoɔ bɛdɔɔso pii, na wɔn a wɔfiri wo mu bɛyɛ sɛ asase so nhahan,

²⁶wode onyinkyerɛ na ɛbɛkɔ damena mu, sɛ wɔde ayuo afiafi ba mu ne berɛ mu no.

²⁷Hwɛ, yei na yɛahwehwɛ ahunu, sɛ ɛteɛ nie; tie, na wo nso, hunu fa!