Read Twi Asante Hiob 8 Bible Online

Hiob 8 - Twi Asante bible

Hiob 8

¹Ɛnna Suhini Bildad gyee so sɛ:

²Ɛnkɔsi berɛ bɛn na wobɛka yeinom, na w’anomu nsɛm bɛyɛ sɛ mframa denden yi?

³ Onyankopɔn bɛkyea atemmuo anaasɛ Otumfoɔ bɛkyea tenenee?

⁴ Sɛ wo mma ayɛ no bɔne a, wagyaa wɔn de wɔn ahyɛ wɔn mmarato nsam.

⁵Sɛ wo ara wohwehwɛ Nyankopɔn akyiri kwan, na wokoto srɛ Otumfoɔ no,

⁶ sɛ wo ho te na wotene a, ampa ara ɔbɛkanyan ne ho ama wo, na wama wo tenenee tenabea no adi yie.

⁷ Na sɛ mpo wo mfitiaseɛ yɛ ketewa a, w’awieeɛ bɛso kokuroo.

⁸Mesrɛ wo, bisa awoɔ ntoatoasoɔ ɛ, na ma w’akoma mmra deɛ wɔn agyanom ahwehwɛ ahunu no so.

⁹ Na yɛn deɛ, nnora nko ara na yɛfiri hɔnom, na yɛnnim hwee, ɛfiri sɛ yɛn nna te sɛ sunsum asase so.

¹⁰Ɛnyɛ wɔn na wɔbɛkyerɛ wo na wɔaka akyerɛ woɔ anaa, na wɔayiyi nsɛm afiri wɔn akoma mu?

¹¹Nkyɛkyerɛ fifiri deɛ ɔwora nnie, anaasɛ mmɛwa bɛma ne ho so deɛ nsuo nnie?

¹²Ɛda so wɔ ne frɔmfrɔmyɛ mu a wɔntwaeɛ no, ɛdi wura nyinaa anim kusa.

¹³ Saa ara na wɔn a wɔn werɛ firi Onyankopɔn nyinaa akwan teɛ, na ɔbɔnefoɔ anidasoɔ bɛyera,

¹⁴ɛfiri sɛ wɔtwa deɛ ɔde ne ho to soɔ, na n’anidasoɔ yɛ ananse ntentan.

¹⁵Ɔtwere ne dan, na ɛrennyina, ɔkura mu, nso ɛrentena hɔ.

¹⁶Ɔyɛ frɔmfrɔm owia ano, na ne mman yiyi kata ne turo so,

¹⁷ne nhini mantammantam aboɔkuo ho, ɔhyɛne aboɔ ntam.

¹⁸Sɛ wɔsɛe no firi ne tenabea a, ɛpa no ka sɛ: Menhunuu wo da.

¹⁹Hwɛ, sɛdeɛ ne kwan ho ahosɛpɛ teɛ ne no, na mfuturo no mu na afoforɔ fifire.

²⁰Hwɛ, Onyankopɔn mpo deɛ ɔdi mu, na abɔnefoɔ nso, ɔnsɔ wɔn nsa.

²¹ Ɔde sereɛ bɛhyɛ w’anomu ma, na wama ahurisie nne afa w’anofafa mu.

²²W’atamfo bɛfira aniwuo, na abɔnefoɔ ntomadan rennyina hɔ bio.