Read Twi Asante Nnwom 103 Bible Online

Nnwom 103 - Twi Asante bible

Nnwom 103

¹Dawid deɛ. Me kra, hyira AWURADE, na me mu adeɛ nyinaa nhyira ne din kronkron.

²Me kra, hyira AWURADE, na mma wo werɛ mmfiri ne nneyɛɛ pa nyinaa.

³ Ɔno na ɔde wo mfomsoɔ nyinaa kyɛ woɔ, na ɔsa wo nyarewa nyinaa.

⁴ Ɔgye wo nkwa firi Amena mu, ɔde adɔeɛ ne mmɔborɔhunu bɔ wo abotire.

⁵ Ɔde adepa hyɛ w’afono ma na wo mmeranteberɛ yɛ foforɔ sɛ ɔkɔdeɛ.

⁶AWURADE di asɛntenenee, na ɔbu atɛn gye wɔn a wɔhyɛ wɔn soɔ nyinaa.

⁷ Ɔde n’akwan kyerɛɛ Mose, ɔmaa Israel mma hunuu ne nneyɛɛ.

⁸ Mmɔborɔhunufoɔ ne ɔdomfoɔ ne AWURADE, ne bo kyɛre fu, na n’adɔeɛ dɔɔso.

⁹ Ɔrenham nkɔsi daapem, na ɔrennya yɛn menasepɔ nkɔsi daa.

¹⁰Ɔnsusu yɛn bɔne so ne yɛn nni, na ɔnhwɛ yɛn mfomsoɔ nhyɛ yɛn ananmu.

¹¹ Na sɛ ɔsoro ware sene asase no, sɛ n’adɔeɛ so, wɔn a wɔsuro no soɔ ne no.

¹²Sɛ apueeɛ ne atɔeɛ ntam ware no, sɛ wama yɛn ne yɛn mmarato ntam aware ne no.

¹³Sɛ agya yam hyehye no ne mma ho no, sɛ AWURADE yam yɛ no wɔn a wɔsuro no ho ne no.

¹⁴ Na ɔnim yɛn su, ɔkae sɛ yɛyɛ mfuturo.

¹⁵ Ɔdasani deɛ, ne nna te sɛ ɛserɛ, ɔyɛ frɔmm sɛ wiram nhwiren.

¹⁶Sɛ mframa bɔ fa ne so a, na ɔnni hɔ, na ne sibea nni no bio.

¹⁷ Na AWURADE adɔeɛ firi daa kɔ daa, wɔn a wɔsuro no so, na ne tenenee wɔ hɔ ma mma mma,

¹⁸ma wɔn a wɔdi n’apam soɔ, na wɔkae n’ahyɛdeɛ sɛ wɔbɛyɛ.

¹⁹AWURADE de n’adwa asi soro, na n’ahennie di ade nyinaa so.

²⁰ AWURADE abɔfoɔ, monhyira no, mo ahoɔden mu akatakyie a modi n’asɛm soɔ na motie ne kasa no.

²¹AWURADE asafo nyinaa, monhyira no, n’asomfo a moyɛ deɛ ɛsɔ n’ani no.

²² AWURADE nnwuma nyinaa, monhyira no, mmeammea a ɔdi tumi nyinaa. Me kra, hyira AWURADE.