Read Twi Asante Nnwom 106 Bible Online

Nnwom 106 - Twi Asante bible

Nnwom 106

¹ Monyi AWURADE ayɛ! Monna AWURADE ase, na ɔyɛ, na n’adɔeɛ wɔ hɔ daa.

²Hwan na ɔbɛtumi aka AWURADE mmaninneɛ, na wama wɔate n’ayeyie nyinaa?

³Nhyira ne wɔn a wɔkura atemmuo mu, ne deɛ ɔdi asɛntenenee daa nyinaa.

⁴AWURADE, wo man ho anisɔ no mu, kae me, wo nkwagyeɛ mu bɛhwɛ me,

⁵na menhunu wɔn a woayi wɔn no nnepa, na m’ani nnye wo nkurɔfoɔ no anigyeɛ ho bi, na me ne w’agyapadeɛ nhyehyɛ yɛn ho.

⁶ Yɛne yɛn agyanom ayɛ bɔne, yɛafom, yɛayɛ bɔne kɛse.

⁷ Yɛn agyanom anhunu w’anwanwadeɛ Misraim, wɔankae w’adɔeɛ dodoɔ no, na wɔtee atua ɛpo ho, Mmɛwa Po ho.

⁸Nanso ne din nti ɔgyee wɔn, sɛ ɔbɛma wɔahunu ne mmaninyɛ.

⁹Ɔteateaa Mmɛwa Po no maa no wee, na ɔde wɔn faa abunu mu sɛ anwea pradada so.

¹⁰Na ɔgyee wɔn firii deɛ ɔkyiri wɔn no nsam, na ɔyii wɔn firii ɔtamfoɔ nsam,

¹¹na nsuo kataa wɔn ahohiahiafoɔ so, wɔn mu baako mpo anka.

¹² Ɛnna wɔgyee ne nsɛm diiɛ, wɔtoo n’ayeyie dwom.

¹³Wɔn werɛ firii ne nneyɛɛ ntɛm, wɔantwɛn n’agyinatuo.

¹⁴ Na wɔn kɔn dɔɔ ntraso ɛserɛ so, na wɔsɔɔ Onyankopɔn hwɛe anwea pradada so.

¹⁵Ɛnna ɔmaa wɔn deɛ wɔbisaeɛ, nanso ɔmaa ɔfɔn baa wɔn kra mu.

¹⁶ Na wɔn ani beree Mose, nsraban no mu, ne Aaron, AWURADE hotefoɔ no.

¹⁷Asase mu bue menee Datan, na ɛkataa Abiram asafo so.

¹⁸Na ogya sɔ kɔkaa wɔn asafo, ogyaframa taferee abɔnefoɔ no.

¹⁹ Wɔyɛɛ nantwie ba Horeb, na wɔkotoo ohoni a wɔguiɛ.

²⁰ Na wɔsakyeraa wɔn animuonyam yɛɛ no nantwie a ɔwe wira nsɛso.

²¹ Wɔn werɛ firii Onyankopɔn a ɔgyee wɔn na ɔyɛɛ nnoɔma akɛseɛ Misraim,

²²ɔyɛɛ anwanwadeɛ Ham asase so, ne ahudeɛ, Mmɛwa Po ho no.

²³ Na ɔse anka ɔbɛsɛe wɔn, nanso Mose a ɔyii no no kɔgyinaa n’anim sii abuo no ano, sɛ ɔbɛyi n’abufuo, na wansɛe wɔn.

²⁴ Na wɔtoo asase a ɛyɛ no ho mpe, wɔannye n’asɛm anni.

²⁵Wɔnwiinwii wɔn ntomadan mu, na wɔantie AWURADE asɛm.

²⁶Ɛnna ɔmaa ne nsa so tiaa wɔn sɛ ɔbɛma wɔatotɔ ɛserɛ so,

²⁷na wabɔ wɔn asefoɔ agu amanaman mu, na wapansam wɔn, nsase so.

²⁸ Na wɔde wɔn ho bɔɔ Baal-peor ho, na wɔdii adefunu afɔrebɔdeɛ,

²⁹na wɔde wɔn nneyɛɛ huruu no, na owuyadeɛ baa wɔn mu.

³⁰Na Pinehas sɔre gyina patae, na ɔsɔɔ owuyadeɛ no ano.

³¹ Na wɔbuu yei tenenee maa no kɔɔ mma mma so kɔsi daa.

³² Na wɔyii no abufuo, Meriba nsuo no so, na wɔn nti ɛwiee Mose bɔne.

³³Na wɔhoo ne honhom werɛ, na ɔde n’ano woroo nsɛm.

³⁴ Wɔankunkum aman a AWURADE kaa wɔn ho asɛm no

³⁵na wɔfrafraa amanaman no mu, na wɔsuasuaa wɔn nneyɛɛ.

³⁶Na wɔsom wɔn ahoni, na ɛdanee wɔn fidie.

³⁷ Na wɔde wɔn mmabanin ne wɔn mmammaa bobɔɔ afɔdeɛ maa abosom,

³⁸na wɔkaa mogya a ɛnni fɔ gui, wɔn mmabanin ne wɔn mmammaa mogya, wɔde wɔn bɔɔ afɔdeɛ maa Kanaan ahoni, maa mogya guu asase no ho fi.

³⁹Na wɔde wɔn nneyɛɛ maa wɔn ho yɛɛ nwunu, na wɔde wɔn nsɛnnie dan nnwamamfoɔ.

⁴⁰Ɛnna AWURADE abufuo dɛre tiaa ne man, na ɔkyirii n’agyapadeɛ.

⁴¹ Na ɔde wɔn hyɛɛ amanaman nsa, na wɔn a wɔkyiri wɔn dii wɔn so.

⁴²Na wɔn atamfoɔ hyɛɛ wɔn so, na wɔbrɛɛ wɔn ase hyɛɛ wɔn nsa ase.

⁴³Ɔgyee wɔn mpɛn pii, na wɔn deɛ, wɔtee atua, wɔn apam so, na wɔbrɛɛ wɔn ase wɔn amumuyɛ mu.

⁴⁴Nanso ɔhwɛɛ wɔn ahohia maa wɔn, ɔtiee wɔn abooboo no.

⁴⁵Na ɔkaee n’apam maa wɔn, na n’adɔeɛ dodoɔ nti ɔyɛɛ ntimmɔborɔ.

⁴⁶Na ɔmaa wɔn a wɔfaa wɔn nnommum nyinaa hunuu wɔn mmɔbɔ.

⁴⁷ Gye yɛn nkwa, AWURADE, yɛn Nyankopɔn, na boaboa yɛn ano firi amanaman mu, na yɛnna wo din kronkron no ase, na yɛmfa w’ayeyie nhyehyɛ yɛn ho.

⁴⁸ Nhyira ne AWURADE, Israel Nyankopɔn firi tete akyirikyiri kɔsi daakye akyirikyiri, na ma ɔman mu no nyinaa nse sɛ: Amen. Monyi AWURADE ayɛ!