Read Twi Asante Nnwom 124 Bible Online

Nnwom 124 - Twi Asante bible

Nnwom 124

¹Ɔsoroforɔ dwom. Dawid deɛ. Sɛ ɛnyɛ AWURADE na ɔwɔ yɛn afa a, ma Israel nka ɛ:

²Sɛ ɛnyɛ AWURADE na ɔwɔ yɛn afa, berɛ a nnipa sɔre tiaa yɛn no a,

³anka wɔn abufuo dɔ tiaa yɛn no, wɔamemmene yɛn animono,

⁴anka nsuo amene yɛn, anka asubɔnten abɔ afa yɛn kra so,

⁵anka nsuo a ɛyɛ ahantan abɔ afa yɛn kra so.

⁶Nhyira ne AWURADE a wamfa yɛn anyɛ hanam amma wɔn se.

⁷Yɛn kra adwane sɛ anomaa afiri afirisumfoɔ fidie mu, fidie no abubu, na yɛn deɛ, yɛadwane.

⁸ Yɛn mmoa wɔ AWURADE a ɔyɛɛ ɔsoro ne asase no din mu.