Read Twi Asante Nnwom 135 Bible Online

Nnwom 135 - Twi Asante bible

Nnwom 135

¹Monyi AWURADE ayɛ. Monyi AWURADE din ayɛ, AWURADE nkoa, monyi no ayɛ,

²mo a mogyina AWURADE fie, yɛn Nyankopɔn fie adihɔ.

³Monyi AWURADE ayɛ, na AWURADE yɛ, monto dwom mma ne din, na ɛyɛ dɛ.

⁴ Na AWURADE ayi Yakob afa, ɔde Israel ayɛ ne deɛ.

⁵ Na me deɛ, menim sɛ AWURADE so, na yɛn wura sene anyame nyinaa.

⁶Biribiara a AWURADE pɛ no, ɔyɛ, ɔsoro ne fam, ɛpo ne abunu nyinaa mu.

⁷ Ɔma amununkum firi asase ano ba, ɔyɛ anyinam ma osutorɔ, ɔyi mframa firi ne korabea.

⁸ Ɔkum Misraim mmakan firi nnipa so kɔsii mmoa so.

⁹ Ɔsomaa nsɛnkyerɛnneɛ ne anwanwadeɛ baa wo, Misraim, mfimfini, Farao ne ne nkoa nyinaa so.

¹⁰Ɔbobɔɔ amanaman pii, na ɔkumm ahemfo atumfoɔ,

¹¹ Amorifoɔ hene Sihon, ne Basan hene Og, ne Kanaan ahennie nyinaa,

¹² na ɔde wɔn asase maa sɛ awunnyadeɛ, ɔde yɛɛ ne man Israel awunnyadeɛ.

¹³ AWURADE, wo din wɔ hɔ daa, AWURADE, wo nkaeɛ tena awoɔ ntoatoasoɔ nyinaa so.

¹⁴ Na AWURADE bɛbu ne man bem, na ɔbɛhu ne nkoa mmɔbɔ.

¹⁵Amanaman ahoni yɛ dwetɛ ne sika kɔkɔɔ, nnipa nsa ano nnwuma.

¹⁶Wɔwɔ ano, nanso wɔnkasa, wɔwɔ ani, nanso wɔnhunu adeɛ,

¹⁷wɔwɔ aso, nanso wɔnte asɛm, nso home biara nni wɔn anomu.

¹⁸Wɔn a wɔyɛ wɔn bɛyɛ sɛ wɔn ara, obiara a ɔde ne ho to wɔn soɔ no.

¹⁹ Israel fiefoɔ, monhyira AWURADE, Aaron fiefoɔ, monhyira AWURADE.

²⁰Lewi fiefoɔ, monhyira AWURADE, mo a mosuro AWURADE, monhyira AWURADE.

²¹Wɔmfiri Sion nhyira AWURADE a ɔte Yerusalem no, monyi AWURADE ayɛ.