Read Twi Asante Nnwom 139 Bible Online

Nnwom 139 - Twi Asante bible

Nnwom 139

¹Wɔde ma dwonkyerɛfoɔ. Dawid dwom. AWURADE, wohwehwɛ me mu, na wohu me.

² Wo na wonim m’asetena ne me sɔreɛ, wohunu m’adwene mu akyirikyiri.

³Wohwehwɛ me nanteɛ ne me nna mu, na wonim m’akwan nyinaa mu yie.

⁴Na asɛm biara nni me tɛkyerɛma so gye deɛ wo, AWURADE, wonim ne nyinaa no.

⁵Woaka me ahyɛm, m’akyiri ne m’anim, na wode wo nsa ato me so.

⁶Saa nimdeɛ yi yɛ me nwanwa dodo, ɛkɔ soro dodo, mentumi nnuru koraa.

⁷Ɛhe na mɛfiri wo honhom no anim madwane makorɔ? Na ɛhe na mɛfiri w’anim madwane makorɔ?

⁸ Sɛ meforo soro a, wowɔ hɔ, na mpo mekɔsɛ me kɛtɛ Asamando a, woni!

⁹ Sɛ mefa adekyeeɛ ntaban metu mekɔtena ɛpo akyiri nohoa a,

¹⁰ɛhɔ nso na wo nsa bɛkɔ akɔgya me, na wo nifa bɛsɔ me mu.

¹¹ Na sɛ mese: Esum nko mmɛkata me so na me ho hann nnane anadwo a,

¹² esum nso nnuru sum mma wo, na anadwo hran sɛ awia, esum ne hann yɛ wo pɛ.

¹³Na wo na wobɔɔ me sawa, wonwonoo me, me na yam.

¹⁴Meda wo ase sɛ woyɛɛ me maa no yɛɛ hu ne nwanwa, wo nneyɛɛ yɛ nwanwa, na me kra nim saa yie.

¹⁵ Me nnompe anhunta wo, berɛ a wɔyɛɛ me ahuntaeɛ mu na wɔnwonoo me asase mu tɔnn no.

¹⁶ Meyɛ mogya toa nko no, w’ani hunuu me, na wo nwoma mu, wɔatwerɛ ne nyinaa, nna a wɔahyɛ asie na emu baako pɛ nnya mmaeɛ no.

¹⁷ Na me deɛ, Onyankopɔn, sɛdeɛ w’adwene boɔ si yɛ me den! Sɛdeɛ ɛsi dɔɔso!

¹⁸ Sɛ merekan a, ɛdɔɔso sene anwea, menyane a, meda so mewɔ wo ho ara.

¹⁹Onyankopɔn, sɛ wobɛkum abɔnefoɔ na mogyapɛfoɔ afiri me so akɔ ɛ!

²⁰Wɔn a wɔkasa tia wo mmusuo mu ne w’atamfo a wɔbɔ wo din ahuhudeɛ mu no.

²¹AWURADE, wɔn a wɔtane woɔ no, mentane wɔn anaa? Na wɔn a wɔsɔre tia woɔ no, me werɛ nho wɔn anaa?

²²Mede ɔtane pa metane wɔn, mebu wɔn m’atamfoɔ.

²³ Onyankopɔn, hwehwɛ me mu, na hunu m’akoma, sɔ me hwɛ, na hunu m’adwene,

²⁴ na hwɛ sɛ amaneɛ kwan bi wɔ me hɔ, na gya me kɔ daa kwan so!