Read Twi Asante Nnwom 143 Bible Online

Nnwom 143 - Twi Asante bible

Nnwom 143

¹Dawid dwom. AWURADE, tie me mpaebɔ, yɛ aso ma me nkotosrɛ, wo nokorɛdie mu gye me so, wo tenenee mu.

² Na mfa w’akoa nkɔ atemmuo mu, na w’anim ɔteasefoɔ biara renni bem.

³Na ɔtamfoɔ taa me kra, ɔbɔ me nkwa hwe fam, ɔma metena sum mu sɛ wɔn a wɔawu dadaada.

⁴Na me honhom tɔ piti me mu, m’akoma asene me yam.

⁵ Mekae tete nna, medwene wo nneyɛɛ nyinaa ho, mesusu wo nsa ano nnwuma ho.

⁶ Metene me nsam mekyerɛ wo, wo ho sukɔm de me kra sɛ asase a awoɔ.

⁷ O AWURADE, yɛ ntɛm gye me so, me honhom tɔ piti, nyi w’ani nhunta me, na manyɛ sɛ wɔn a wɔsiane kɔ Amena mu.

⁸Ma mente w’adɔeɛ anɔpa, na wo so na mede me ho metoɔ. Ma menhunu kwan a memfa soɔ, na wo na mema me kra so mekyerɛ woɔ.

⁹O AWURADE, yi me firi m’atamfoɔ nsam. Wo nkyɛn na mede me ho makora.

¹⁰ Kyerɛkyerɛ me deɛ wopɛ yɛ, na wone me Nyankopɔn, wo honhom pa no nnya me asase tee so.

¹¹ Wo din nti, AWURADE, ma mennya nkwa, wo tenenee mu yi me kra firi ahohia mu,

¹² na w’adɔeɛ mu yi m’atamfoɔ hɔ, na sɛe wɔn a wɔha me kra nyinaa, na w’akoa ne me.