Read Twi Asante Nnwom 145 Bible Online

Nnwom 145 - Twi Asante bible

Nnwom 145

¹Dawid ayeyie dwom. Mɛma wo so, me Nyankopɔn, ɔhene, na mɛhyira wo din daa daa.

²Mɛhyira wo daa nyinaa, na mɛyi wo din ayɛ daa daa.

³AWURADE so, na ɔsɛ ayeyie kɛse, ne kɛseyɛ mu nni hwehwɛeɛ.

⁴Awoɔ ntoatoasoɔ kamfo wo nnwuma kyerɛ awoɔ ntoatoasoɔ foforɔ, na wɔka wo mmaninneɛ.

⁵Mɛdwene w’animuonyam a ɛhran no kɛseyɛ ne w’anwanwasɛm no ho.

⁶Na wɔka wo nneyɛɛ a ɛyɛ hu no tumi ho asɛm, na mɛka w’ade kɛseɛ makyerɛ.

⁷Wɔworo wo papayɛ bebrebe no nkaeɛ, na wɔto wo tenenee ho ahurisie dwom.

⁸ AWURADE yɛ ɔdomfoɔ ne mmɔborɔhunufoɔ, ne bo kyɛre fu na n’adɔeɛ so.

⁹ AWURADE yɛ ma nnipa nyinaa, na ne mmɔborɔhunu wɔ ne nnwuma nyinaa so.

¹⁰AWURADE, wo nnwuma nyinaa da wo ase, na w’ahotefoɔ hyira wo.

¹¹Wɔka w’ahennie animuonyam, na wɔbɔ wo mmaninyɛ din,

¹² sɛ wɔbɛma nnipa mma ahunu ne mmaninneɛ ne n’ahennie animuonyam a ɛhran no.

¹³W’ahennie yɛ daa ahennie, na wo tumidie fa awoɔ ntoatoasoɔ nyinaa mu.

¹⁴ AWURADE wowa wɔn a wɔhwe aseɛ nyinaa, na ɔma wɔn a wɔakotoɔ nyinaa so gyina.

¹⁵ Ani nyinaa hwɛ wo kwan, na woma wɔn wɔn aduane ne berɛ mu.

¹⁶Wobue wo nsam, na woma ateasefoɔ nyinaa nya deɛ wɔpɛ di mee.

¹⁷ AWURADE tene, n’akwan nyinaa mu, na ɔyɛ adɔeɛ ne nnwuma nyinaa mu.

¹⁸AWURADE bɛn wɔn a wɔfrɛ no nyinaa, wɔn a wɔfrɛ no nokorɛ mu nyinaa.

¹⁹ Ɔyɛ deɛ wɔn a wɔsuro no no pɛ ma wɔn, na ɔtie wɔn sufrɛ, na ɔgye wɔn.

²⁰AWURADE hwɛ n’adɔfo nyinaa so, na abɔnefoɔ nyinaa deɛ, ɔbɛsɛe wɔn.

²¹M’ano bɛka AWURADE ayeyie, na ma honam nyinaa nhyira ne din kronkron daa daa.