Read Twi Asante Nnwom 146 Bible Online

Nnwom 146 - Twi Asante bible

Nnwom 146

¹Monyi AWURADE ayɛ! Me kra, yi AWURADE ayɛ.

²Mete ase yi, mɛyi AWURADE ayɛ, mewɔ hɔ yi, mɛto dwom mama me Nyankopɔn.

³ Mommfa mo ho nnto ahemfo anaa onipa ba a nkwagyeɛ biara nni ne mu so.

⁴ Ne honhom firi kɔ, ɔsane kɔ ne dɔteɛ mu, da no ara ne tirim a ɔbɔeɛ yera.

⁵Nhyira ne deɛ Yakob Nyankopɔn ne ne boafoɔ, deɛ n’ani da AWURADE, ne Nyankopɔn, soɔ.

⁶Ɔno na ɔyɛɛ ɔsoro ne asase, ɛpo ne deɛ ɛwom nyinaa, ɔno na ɔkora nokorɛ daa.

⁷Ɔbu atɛn ma wɔn a wɔdi wɔn amim, ɔma wɔn a ɛkɔm de wɔn aduane. AWURADE tu nneduafoɔ.

⁸ AWURADE bue anifirafoɔ ani, AWURADE ma wɔn a wɔakotoɔ so gyina, AWURADE dɔ ateneneefoɔ,

⁹ AWURADE kora ahɔhoɔ, ɔgyina nwisiaa ne akunafoɔ akyi, na abɔnefoɔ kwan deɛ, ɔdane ani.

¹⁰ AWURADE di hene daa, Sion, wo Nyankopɔn di hene kɔ awoɔ ntoatoasoɔ nyinaa so. Monyi AWURADE ayɛ!