Read Twi Asante Nnwom 17 Bible Online

Nnwom 17 - Twi Asante bible

Nnwom 17

¹Dawid mpaebɔ. O AWURADE, tie asɛntenenee, wɛn w’aso ma m’abooboo, yɛ aso ma me mpaebɔ a ɛmfiri nnaadaa anofafa mu.

² Ma bembuo mfiri w’anim mmra, ma w’ani nhwɛ adeɛ a ɛtene mu.

³ Sɛ wosɔ m’akoma hwɛ, na wohwehwɛ me mu anadwo, na wonane me yiyi mu, worenhunu hwee. Mabɔ me tirim sɛ meremma asɛmmɔne mfiri m’ano.

⁴Nnipa nneyɛɛ fam, w’anomu asɛm no nti masɔre me ho, awerɛmfoɔ akwan ho.

⁵W’anammɔn no ara so na me kwan nam, me nan anwati.

⁶Ao, Onyankopɔn, mesu mefrɛ wo, na wobɛgye me so. Yɛ aso ma me, tie me nsɛm.

⁷ Fa anwanwa kwan so yi wo dɔ mapa adi kyerɛ, wo a wogye wɔn a wɔhwehwɛ dwanekɔbea, firi wɔn atamfoɔ nsam wɔ wo nifa.

⁸ Hwɛ me so sɛ ani kurutuawisi, fa me hunta wo ntaban nwunu ase,

⁹abɔnefoɔ a wɔfom me fa, m’atamfoɔ atirimuɔdenfoɔ a wɔtwa me ho hyia no nti.

¹⁰Wɔapirim wɔn akoma a wɔnni mmɔborɔhunu biara, wɔde wɔn ano kasa ahantan kasa.

¹¹Wɔtetɛ me, na afei wɔtwa me ho hyia, wɔde wɔn ani akari me pɛ m’asehweɛ.

¹² Wɔte sɛ gyata a wɔredɛɛdɛɛ apɛ adufudeɛ, te sɛ gyata ba a ɔtɛ kokoam.

¹³Ao, AWURADE, sɔre bɛsianka wɔn na brɛ wɔn ase, fa w’afena gye me kra firi abɔnefoɔ nsam.

¹⁴ AWURADE, fa wo nsa bɛgye me firi nnipa nsam, nnipa a wɔn nkwa kyɛfa yɛ wiase deɛ, fa deɛ wɔasiesie ama wɔn hyɛ wɔn yafunu ma; ma wɔn mma nya no mmorosoɔ, na wɔnnya bi mma wɔn mmotafowa.

¹⁵Me deɛ, mɛhwɛ w’anim tenenee mu, menyane a, me ho bɛtɔ me sɛ mahu woɔ.