Read Twi Asante Nnwom 18 Bible Online

Nnwom 18 - Twi Asante bible

Nnwom 18

¹Wɔde ma dwonkyerɛfoɔ. AWURADE akoa Dawid deɛ. Ɔkaa dwom yi nsɛm kyerɛɛ AWURADE, da a AWURADE gyee no n’atamfo nyinaa ne Saulo nsam no. Ao, AWURADE, m’ahoɔden, medɔ wo.

² AWURADE ne me botan ne m’abankɛseɛ ne me gyefoɔ, me Nyankopɔn ne me botantim a medwane kɔtoa no, me kyɛm ne me nkwagyeɛ abɛn, m’abantenten.

³Mesu mefrɛ AWURADE, ɔno a ɔfata sɛ wɔyi no ayɛ, na wɔagye me m’atamfoɔ nsam.

⁴ Owuo nhoma bebaree me ho, na ɔsɛeɛ twi faa me so sɛ osuhweam.

⁵Asamando nhoma twaa me ho kɔntɔnkrɔn, owuo afidie bɛhyiaa me.

⁶M’ahohia mu mesu mefrɛɛ AWURADE, me Nyankopɔn, na meteaa mu mefrɛɛ no. Ɔtee me nne n’asɔrefie, na me su a mesu mekyerɛɛ no no kɔduruu n’aso mu.

⁷Ɛnna asase hinhimiiɛ na ɛwosoeɛ, na mmepɔ nnyinasoɔ popoe, na ɛhinhimii, ɛfiri sɛ na ne bo ahuru no.

⁸ Wisie tu firii ne hwenem, na ogya a ɛhye adeɛ firii n’anomu, nnyansramma dɛre firii ne mu.

⁹ Na ɔkuntunuu ɔsoro mu, na ɔsii fam, na esum kabii wɔ ne nan ase.

¹⁰ Na ɔtenaa Kerub so na ɔtui, na ɔde mframa ntaban tu bae afrɛ so.

¹¹ Ɔde sum kataa ne ho hyiae; n’asasewa yɛ osuo a amuna kusuu.

¹²Hann a ɛdi n’anim no nnyansramma firi ne mununkum no mu bae.

¹³Na AWURADE boom ɔsoro, na ɔsorosoroni no maa wɔtee ne nne, asukɔtweaa ne nnyansramma.

¹⁴ Na ɔtotoo n’agyan de bɔɔ wɔn hwetee ne asraman bebree de tanee wɔn ani.

¹⁵Ɛnna ɛpo mu mmɔnka yiyii adie, na wiase nnyinasoɔ ho daa hɔ, ɛfiri w’ateatea, AWURADE, ne wo hwene mu home hahyeehahyee no.

¹⁶ Ɔtenee ne nsa firi soro bɛfaa me, ɔtwee me firii nsuo pii mu.

¹⁷Ɔgyee me firii me tamfo hoɔdenfoɔ ne wɔn a wɔkyiri me nsam, ɛfiri sɛ wɔsene me ahoɔden.

¹⁸Wɔbɛtoaa me m’amanehunu da no mu, na AWURADE bɛyɛɛ me okyiritaafoɔ.

¹⁹ Na ɔyii me kɔgyinaa deɛ ɛhɔ trɛ, ɔgyee me, ɛfiri sɛ mesɔɔ n’ani.

²⁰AWURADE tuaa me ka sɛdeɛ me tenenee teɛ, sɛdeɛ me nsa ho a afire no teɛ na ɔtuaa me ho ka.

²¹Na manante AWURADE akwan so, na menyɛɛ bɔne mennyaa me Nyankopɔn,

²² na mmom n’atemmudeɛ nyinaa wɔ m’ani so, na memfirii n’ahyɛdeɛ ho.

²³ Na me ho nni asɛm wɔ n’anim, na mehwɛɛ me ho so firii amumuyɛ ho.

²⁴Na AWURADE atua me ka sɛdeɛ me tenenee, sɛdeɛ me nsa ho a afire wɔ n’ani soɔ no teɛ.

²⁵Ɔnokwafoɔ na wo ne no bɛdi no nokorɛ mu, onipa a ɔdi mu na wo ne no bɛdi no mudie soɔ.

²⁶Deɛ ɔte ne ho na wobɛte wo ho akyerɛ no, na ɔkontonkyini deɛ, wokyinkyim wo ho kyerɛ no.

²⁷ Na wo na wogye ahobrɛasefoɔ, na wobrɛ ahantanfoɔ ase.

²⁸Na wo na woma me kanea derɛ, AWURADE me Nyankopɔn te me sum mu.

²⁹ Na wo na mede wo meto mehyɛ ɛdɔm soɔ, na mede me Nyankopɔn mehuri metra ɔfasuo.

³⁰ Na Onyankopɔn yi deɛ, ne kwan yɛ pɛpɛ, AWURADE asɛm mu te, ɔyɛ ɛkyɛm ma wɔn a wɔdwane kɔtoa no nyinaa.

³¹Na hwan ne Nyankopɔn sɛ AWURADE nko, na hwan na ɔyɛ ɔbotan sɛ yɛn Nyankopɔn?

³²Onyankopɔn a ɔde ahoɔden bɔɔ me abɔsoɔ, na ɔma me kwan yɛ pɛpɛɛpɛ.

³³Ɔyɛ me nan sɛ aforotebereɛ deɛ, na ɔde me gyina me sorɔnsorɔmmea so.

³⁴ Ɔkyerɛ me nsa akodie, na ɔma me basa kuntunu kɔbere mfrafraeɛ tadua.

³⁵ Na woama me wo nkwagyeɛ kyɛm, na wo nsa nifa sɔɔ me mu, na wo mmoa maa meyɛɛ kɛseɛ.

³⁶ Wotrɛɛ m’anammɔn mu m’ase, na me nan anwatiri.

³⁷Metii m’atamfoɔ, na metoo wɔn, na mansane de kɔsii sɛ mewiee wɔn kum.

³⁸Mebobɔɔ wɔn, na wɔantumi ansɔre, wɔtotɔree me nan ase.

³⁹Na wode ahoɔden bɔɔ me abɔsoɔ maa akodie, wobrɛɛ wɔn a wɔsɔre tiaa me no ase hyɛɛ m’ase,

⁴⁰na womaa m’atamfoɔ danee wɔn akyiri kyerɛɛ me, na wɔn a wɔkyiri me no, mesɛee wɔn.

⁴¹ Wɔsu frɛe a ɔgyefoɔ bi nni hɔ, wɔfrɛɛ AWURADE, na wammua wɔn.

⁴²Na mepɛkyɛɛ wɔn meyɛɛ wɔn sɛ mfuturo, mframa anim, mesesaa wɔn meguu sɛ mmorɔno so dɔteɛ.

⁴³Woyii me nnipa aperedie mu, wode me sii amanaman so ti, ɔman a mennim wɔn na ɛsom me.

⁴⁴Aso teeɛ ara pɛ, na wɔtiee me, ananafoɔ brɛɛ wɔn ho ase maa me.

⁴⁵Ananafoɔ twintwamee, na wɔde ahopopoɔ fifirii wɔn huntabea bae.

⁴⁶AWURADE te ase, na nhyira ne me botantim no. Na me nkwagyeɛ Nyankopɔn no, wɔmma no so.

⁴⁷Onyankopɔn a ɔtɔɔ were maa me, na ɔde aman hyɛɛ m’aseɛ;

⁴⁸wagye me afiri m’atamfoɔ mu, aane, woama me so afiri wɔn a wɔsɔre tiaa me no mu, woagye me awerɛmfoɔ nsam.

⁴⁹ Enti, AWURADE, mɛda wo ase amanaman mu, na mabɔ wo din mato ayeyie nnwom,

⁵⁰ sɛ wone deɛ ɔma ne hene nkwagyeɛ soɔ, na ɔyɛ deɛ wasra no no adɔeɛ, Dawid ne n’asefoɔ daa.