Read Twi Asante Nnwom 21 Bible Online

Nnwom 21 - Twi Asante bible

Nnwom 21

¹Wɔde ma dwonkyerɛfoɔ. Dawid dwom. Ao, AWURADE, wo na ɔhene ani gye wɔ w’ahoɔden mu, na wo nkwagyeɛ nti hwɛ sɛdeɛ ne ho si sane no fa.

² Deɛ n’akoma pɛ na wode ama no, na deɛ n’ano bisaeɛ no, woankame no.

³ Na wode papa mu nhyira hyia no, wode sika amapa abotire bɔ ne ti.

⁴Ɔbisaa wo hɔ nkwa, wode ama no, nna a ɛware daa daa.

⁵N’animuonyam so wo nkwagyeɛ nti, kɛseyɛ ne anidie na wode ama no.

⁶Aane, wode no asi hɔ sɛ nhyira nko ara daa, wode w’anim anigyeɛ gye n’ani.

⁷Ɛfiri sɛ ɔhene ani da AWURADE so, na deɛ ɔwɔ sorosoro adɔeɛ nti ɔrenhinhim.

⁸Wo nsa bɛka w’atamfo nyinaa, wo nsa nifa bɛnya wɔn a wɔkyiri woɔ.

⁹Wobɛyi wo ho adi ayɛ wɔn sɛ ogya fononoo, AWURADE de n’abufuo bɛmene wɔn, na ogya ahye wɔn.

¹⁰ Wobɛsɛe wɔn aba afiri asase so, ne wɔn asefoɔ afiri nnipa mma mu.

¹¹ Sɛ wɔbɔ wo ho pɔ bɔne na wɔsusu bɔne bi ho a, wɔrentumi nyɛ.

¹² Na wobɛma wɔasane wɔn akyi, wode wo bɛmma bɛkyerɛ wɔn anim.

¹³AWURADE, ma wo ho so w’ahoɔden mu, yɛde adwontoɔ ne sankuo bɛkamfo wo mmaninneɛ.