Read Twi Asante Nnwom 25 Bible Online

Nnwom 25 - Twi Asante bible

Nnwom 25

¹Dawid deɛ. AWURADE, wo na mema me kra so mekyerɛ woɔ.

²Me Nyankopɔn, wo so na mede me ho matoɔ, mma m’ani nnwu, mma m’atamfoɔ ho nnsɛpɛ wɔn, me nti.

³ Ampa ara, wɔn a wɔhwɛ wo kwan no biara ani renwu, wɔn a wɔtwa nkontompo kwa no na wɔn ani bɛwuo.

⁴ AWURADE, kyerɛ me w’akwan, na fa me fa w’atempɔn so.

⁵Ma mennante wo nokorɛ mu, na kyerɛkyerɛ me, ɛfiri sɛ wone me nkwagyeɛ Nyankopɔn, m’ani da wo so daa nyinaa.

⁶AWURADE, kae wo mmɔborɔhunu ne w’adɔeɛ a ɛwɔ hɔ firi tete no.

⁷ Nkae me mmɔfraase bɔne ne me mfomsoɔ, na mmom kae me sɛdeɛ w’adɔeɛ teɛ, AWURADE, w’ayamyie nti.

⁸AWURADE yɛ, na ɔtene, enti na ɔkyerɛkyerɛ nnebɔneyɛfoɔ ɔkwan soɔ.

⁹Ɔma ahobrɛasefoɔ nante tenenee mu, na ɔma ahobrɛasefoɔ sua ne kwan.

¹⁰AWURADE atempɔn nyinaa yɛ adɔeɛ ne nokorɛ ma wɔn a wɔdi n’apam ne n’adansesɛm soɔ.

¹¹AWURADE, wo din nti fa me bɔne kyɛ me, na ɛdɔɔso pii.

¹² Onipa biara a ɔsuro AWURADE no, ɔbɛkyerɛ no kwan a ɔmfa soɔ.

¹³ Ne kra bɛtena yiedie mu, na n’asefoɔ anya asase atena so.

¹⁴ AWURADE yi ne tirim asɛm kyerɛ wɔn a wɔsuro no, na ɔma wɔhunu n’apam no mu.

¹⁵M’ani hwɛ AWURADE daa, na ɔno na ɔbɛyi me nan afiri afidie mu.

¹⁶Dane w’ani hwɛ me, na dom me, na meyɛ ankonam, na meyɛ mmɔbɔ.

¹⁷M’akoma mu ahohia so, yi me firi m’ahokyere mu.

¹⁸Hwɛ m’amaneɛ ne m’ahometeɛ, na fa me bɔne nyinaa kyɛ me.

¹⁹ Hwɛ sɛ m’atamfoɔ dɔɔso, na wɔde atirimuɔden tane me.

²⁰ Hwɛ me kra so na gye me, mma m’ani nnwu, na medwane bɛtoa wo.

²¹ Ma pɛyɛ ne teeyɛ nhwɛ me so, ɛfiri sɛ m’ani da wo so.

²² Onyankopɔn, gye Israel firi wɔn ahohia nyinaa mu.