Read Twi Asante Nnwom 27 Bible Online

Nnwom 27 - Twi Asante bible

Nnwom 27

¹Dawid deɛ. AWURADE ne me hann ne me nkwagyeɛ, hwan na mensuro no? AWURADE ne me nkwa ahoɔden, hwan anim na me ho mpopoɔ?

² Nnipa bɔne a wɔhyɛ me so na wɔtane me, sɛ wɔretoa me abɛsunsuane me a, wɔawatiwatiri na wɔahwehwe ase.

³ Sɛ dɔm kyere me so nsraban a, m’akoma rentu; sɛ wɔtu me so sa a, ɛno mu mpo na me ho tɔ me.

⁴ Adeɛ baako na masrɛ AWURADE, ɛno na mɛhwehwɛ akyiri kwan; sɛ me nna a medie nyinaa mɛtena AWURADE fie, na mahwɛ AWURADE animteɛ, na madwene me tirim wɔ n’asɔrefie.

⁵ Na ɔkora me ne sese mu wɔ hia da, ɔde me hunta ne ntomadan ahuntaeɛ, ɔma me so gyina ɔbotan so.

⁶Na afei ɔbɛma me tiri so, m’atamfoɔ a wɔatwa me ho ahyia no so, na mabɔ ne ntomadan mu ayeyie afɔdeɛ, na mato AWURADE sankuo dwom.

⁷AWURADE, tie me sufrɛ; hu me mmɔbɔ, na gye me so.

⁸ Woaka sɛ: Monhwehwɛ m’anim, nti, m’akoma se wo sɛ: AWURADE, w’anim na merehwehwɛ.

⁹Nyi w’anim nhunta me, mfa abufuo mpamo w’akoa. Me boafoɔ ne wo, nto me ntwene, na nnya me, me nkwagyeɛ Nyankopɔn.

¹⁰ Na m’agya ne me na agya me, na AWURADE deɛ, ɔgye me.

¹¹ AWURADE, kyerɛ me wo kwan, na fa me fa ɔtempɔn tamaa so, m’atɛfoɔ nti.

¹²Nnane me mma sɛdeɛ m’atamfoɔ pɛ, na adansekurumfoɔ asɔre atia me, ne wɔn a wɔpu aniɛdensɛm.

¹³ Megye medi sɛ mɛhunu AWURADE ayamyɛ, ateasefoɔ asase so.

¹⁴ Ma w’ani nna AWURADE so, hyɛ wo ho den na ma wo bo nyɛ duru, Aane, ma w’ani nna AWURADE so.