Read Twi Asante Nnwom 31 Bible Online

Nnwom 31 - Twi Asante bible

Nnwom 31

¹Wɔde ma dwonkyerɛfoɔ. Dawid dwom. Wo, AWURADE, na madwane abɛtoa woɔ, mma m’anim nngu ase da biara da. Fa wo tenenee so gye me,

² yɛ aso ma me, yɛ ntɛm gye me. Yɛ me dwanekɔhyɛbea botan ne srɔnsrɔn so aban sɛ wɔbɛgye me nkwa.

³ Na wone me botantim ne me tenabea srɔnsrɔn, na wo din nti wobɛkyerɛ me kwan na woakɔgya me.

⁴ Wobɛyi me afiri afidie a wɔahunta asum me no mu, na wo ara ne m’aban a ɛyɛ den.

⁵ Wo nsam na mede me honhom mehyɛ, AWURADE, nokorɛ Nyankopɔn, woagye me.

⁶Metane wɔn a wɔdi atorɔ ahuhudeɛ akyire, na me deɛ, mebata AWURADE ho.

⁷Mɛdi ahurisie, na m’ani agye w’adɔeɛ ho, sɛ woahwɛ m’amanehunu, na woahunu me kra ahohia.

⁸ Na woanyi me anhyɛ ɔtamfoɔ nsa, wode me nan agyina deɛ ɛtrɛ.

⁹ AWURADE, hu me mmɔbɔ, na me ho dwan me. Awerɛhoɔ ama m’ani ne me kra ne me honam atwintwam.

¹⁰Na me nkwa ahwere yea mu, na me mfeɛ ahwere ahomeguo mu. M’amumuyɛ nti m’ahoɔden so ahwan, na me nnompe ahodwo.

¹¹ M’ahohiahiafoɔ nyinaa nti mayɛ ɔhohorafoɔ, na mayɛ me ho tefoɔ so duru, na m’amannifoɔ suro me, wɔn a mefiri adi a wɔhu me dwane me.

¹²Nnipa werɛ afiri me sɛ owufoɔ, mayɛ sɛ adeɛ a wɔto twene.

¹³ Na mete nnipa bebree nsekudie, ahudeɛ atwa me ho ahyia, sɛdeɛ me ho agyina a wɔakorɔ no mu wɔabɔ wɔn tirim sɛ wɔbɛsɛe me kra.

¹⁴Na me deɛ, wo, AWURADE, so na mede me ho matoɔ. Mese: Wone me Nyankopɔn.

¹⁵ Wo nsam na me mmerɛ wɔ, gye me m’atamfoɔ ne m’ataafoɔ nsam.

¹⁶ Te w’anim kyerɛ w’akoa, fa w’adɔeɛ so gye me nkwa.

¹⁷AWURADE mma m’anim nngu ase, na mesu mefrɛ wo. Ma abɔnefoɔ anim ngu ase, na wɔntotɔre mum Asamando.

¹⁸Ma atorofoɔ ano mmua, wɔn a wɔka ɔteneneeni ho nsɛm a ɛyɛ den ahokyerɛ ne aniammɔho mu no.

¹⁹Wo papa a wode asie ama wɔn a wɔsuro wo no sɛdeɛ asi so fa! Ɛno na woyi kyerɛ wɔn a wɔdwane bɛtoa woɔ no, nnipa anim.

²⁰ Wode w’anim bɔ wɔn ho ban de wɔn hunta firi nnipa a wɔabɔ kyenku anim, wode wɔn sie ɔsese mu firi tɛkyerɛma birebire ho.

²¹ Nhyira ne AWURADE sɛ wama n’adɔeɛ ayɛ nwanwa ama me, kuro a ahohiahia wɔ.

²² Nso me deɛ, mekaa no m’ahoyera mu sɛ: Wɔatwa me afiri w’ani so. Nanso mesu mefrɛɛ woɔ no, wotee me nkotosrɛ.

²³Monnɔ AWURADE, mo a moyɛ n’ahotefoɔ nyinaa. AWURADE hwɛ wɔn a wɔdi nokorɛ so, na ɔtua deɛ ɔdi ahantansɛm no ka ma no boro so.

²⁴ Monhyɛ mo ho den na monsi mo bo, mo a motwɛn AWURADE nyinaa.