Read Twi Asante Nnwom 34 Bible Online

Nnwom 34 - Twi Asante bible

Nnwom 34

¹Dawid deɛ a ɔtoeɛ berɛ a ɔdanee sɛ ɔbɔdamfoɔ Abimelek anim na ɔpamm no maa no kɔeɛ no. Mɛhyira AWURADE nna nyinaa, n’ayeyie wɔ m’anomu daa yi.

²AWURADE mu na me kra bɛhoahoa ne ho, ahobrɛasefoɔ bɛte, na wɔn ani agye.

³Mo ne me nkamfo AWURADE kɛseyɛ, na momma yɛmmom mma ne din so.

⁴Mahwehwɛ AWURADE, na wabua me, na wagye me afiri deɛ mesuro nyinaa mu.

⁵Wɔn a wɔhwɛɛ no no anim tee, na wɔn anim angu ase.

⁶Ohiani yi teaa mu, na AWURADE tiee no, na ɔgyee no n’ahohia nyinaa mu.

⁷ AWURADE bɔfoɔ bɔ wɔn a wɔsuro no ho nsraban hyia, na ɔgye wɔn.

⁸ Monka nhwɛ na monhunu sɛ AWURADE yɛ, nhyira ne onipa a ɔdwane kɔtoa no.

⁹ AWURADE akronkronfoɔ, monsuro no! na biribiara remmɔ wɔn a wɔsuro no.

¹⁰ Gyata mmuruwa bɛdi hia na ɛkɔm ade wɔn, na wɔn a wɔhwehwɛ AWURADE no adepa biara remmɔ wɔn.

¹¹Mma, mommra, monyɛ aso mma me! Mɛkyerɛ mo AWURADE suro.

¹² Mo mu hwan na ɔhwehwɛ nkwa, na ɔpɛ onyinkyerɛ sɛ ɔbɛhunu papa?

¹³Kora wo tɛkyerɛma, bɔne ho, ɛne w’ano, nnaadaasɛm ho.

¹⁴ Yi bɔne ho akwa, na yɛ papa, hwehwɛ asomdwoeɛ, na ti no.

¹⁵AWURADE ani wɔ ateneneefoɔ so, na n’aso tie wɔn sufrɛ.

¹⁶ AWURADE ani sa nnebɔneyɛfoɔ, sɛ ɔbɛhye wɔn ase, asase so.

¹⁷Ateneneefoɔ su frɛ, na AWURADE tie, na ɔgye wɔn firi wɔn ahohia nyinaa mu.

¹⁸ AWURADE bɛn wɔn a wɔn akoma abubuo, na ɔgye wɔn a wɔn honhom apɛkyɛ.

¹⁹ Ɔteneneeni amaneɛ dɔɔso, na AWURADE gye no ne nyinaa mu.

²⁰Ɔhwɛ ne nnompe nyinaa, sɛdeɛ emu baako mpo mmu.

²¹Bɔne bɛkum ɔbɔnefoɔ, na wɔn a wɔtane ɔteneneeni no bɛbrɛ mu.

²²AWURADE gye ne nkoa kra, na wɔn a wɔdwane kɔtoa no nyinaa wɔremmu wɔn fɔ.