Read Twi Asante Nnwom 36 Bible Online

Nnwom 36 - Twi Asante bible

Nnwom 36

¹Wɔde ma dwonkyerɛfoɔ. AWURADE akoa Dawid deɛ. Ɔbɔnefoɔ mmarato kasa wɔ n’akoma mu: Nyankopɔn suro biara nni n’ani so.

²Na ɔbu ne ho bi ɔno ara ani so sɛ wɔrenhunu n’amumuyɛ na wɔakyi.

³N’anomu nsɛm yɛ ahuhusɛm ne nnaadaa, wagyae nimdeɛsua ne papayɛ.

⁴ Ɔdwene amumuyɛdeɛ ne kɛtɛ so, ɔde ne nan asi ɔkwan a ɛnyɛ so; bɔne deɛ, ɔnkyi.

⁵ Ao, AWURADE, w’adɔeɛ kɔduru soro, na wo nokorɛ kɔduru wiem tɔnn.

⁶ Wo tenenee te sɛ Nyankopɔn mmepɔ, w’atemmuo te sɛ ebunu a emu dɔ. AWURADE, wogye nnipa ne mmoa nkwa.

⁷Ao, Onyankopɔn, hwɛ sɛdeɛ w’adɔeɛ no si so fa! Na nnipa mma de wɔn ho kɔhyɛ wo ntaban nwunu ase.

⁸ Wo fie mu sradeɛ meemee wɔn, na woma wɔnom w’anigyeɛ asubɔnten.

⁹ Ɛfiri sɛ wo nkyɛn na nkwa nsutire wɔ, wo hann mu na yɛhunu hann.

¹⁰Ma w’adɔeɛ nkyɛre mma wɔn a wɔni woɔ, ne wo tenenee mma akoma mu teefoɔ.

¹¹Mma ɔhantanni nan nntia me, na mma abɔnefoɔ nsa nnsum me!

¹²Ɛnneɛ na amumuyɛfoɔ atotɔ, wɔasum wɔn ahwehwe fam a wɔntumi nsɔreɛ.