Read Twi Asante Nnwom 37 Bible Online

Nnwom 37 - Twi Asante bible

Nnwom 37

¹Dawid deɛ. Nha wo ho nnebɔneyɛfoɔ nti, mma wo bo nnha wo amumuyɛfoɔ ho;

²na ɛrenni da bi na wɔatwa wɔn agu sɛ ɛserɛ, na wɔakusa sɛ wura mono a wɔatwa.

³ Bata AWURADE ho, na yɛ papa, tena asase so, na di nokorɛ,

⁴na ma w’ani nka AWURADE ho, na wama wo deɛ w’akoma pɛ.

⁵ Fa wo kwan hyɛ AWURADE nsam, na fa wo ho to ne so, na ɔno na ɔbɛyɛ,

⁶ na wayi wo tenenee adi sɛ adekyeeɛ, ne wo bem sɛ owigyinaeɛ.

⁷ Yɛ komm ma AWURADE, na tɔ wo bo ase twɛn no. Nha wo ho, deɛ ne kwan asi no yie no nti, onipa a ɔdi ne bo soɔ no nti.

⁸Ma abufuo ntwa, na gyae bo bɔne yɛ, nha wo ho, na ɛbɛwie bɔne nko,

⁹ na wɔbɛyi nnebɔneyɛfoɔ hɔ, na wɔn a wɔtwɛn AWURADE no, wɔn na wɔbɛnya asase no adie.

¹⁰ Aka kakraa bi na ɔbɔnefoɔ nni hɔ, na wɔhwehwɛ ne tenaberɛ a, na ɔnni hɔ.

¹¹ Na ahobrɛasefoɔ bɛtena asase no so, na wɔagye wɔn ani asomdwoeɛ bebree mu.

¹²Ɔbɔnefoɔ susu ɔteneneeni ho asɛm, na ɔtwɛre ne se gu ne so,

¹³ AWURADE sere no, ɛfiri sɛ wahunu sɛ ne da reba.

¹⁴ Abɔnefoɔ atwe nkrantɛ, na wɔakuntunu wɔn tadua mu sɛ wɔbɛma ɔmanehunufoɔ ne ohiani ahwe ase, na wɔaku wɔn a wɔn abrabɔ yɛ:

¹⁵Wɔn nkrantɛ bɛwɔ wɔn ara wɔn akoma mu, na wɔn tadua abubu.

¹⁶ Adeɛ kakra a onipa tenenee wɔ no yɛ sene abɔnefoɔ bebree ahonyadeɛ dodoɔ,

¹⁷na abɔnefoɔ abasa bɛbubu, na AWURADE wowa ateneneefoɔ.

¹⁸AWURADE nim wɔn a wɔdi mu no nna, na wɔn agyapadeɛ bɛtena hɔ daa.

¹⁹ Wɔn ani renwu berɛ bɔne mu, na wɔbɛmee, ɛkɔm nna mu.

²⁰ Na abɔnefoɔ deɛ, wɔbɛyera, na AWURADE atamfoɔ bɛyɛ sɛ ɛserɛ so nhwiren, wɔbɛhye awie sa sɛ wisie.

²¹Ɔbɔnefoɔ fɛm, na ɔntua, na ɔteneneeni hunu mmɔbɔ, na ɔma.

²² Na wɔn a wahyira wɔn na ɛbɛtena asase so, na wɔn a wabɔ wɔn dua no, wɔbɛyi wɔn hɔ.

²³AWURADE na ɔde onipa anammɔn sisi yie, na ne kwan sɔ n’ani,

²⁴ sɛ ɔhwe ase a, ɔrentɔ fam tim, ɛfiri sɛ AWURADE kura ne nsam.

²⁵ Mayɛ abɔfra, na afei mabɔ akora, nanso menhunuu onipa tenenee a wɔapa no anaasɛ n’asefoɔ resrɛ aduane.

²⁶Ɔhunu mmɔbɔ daa, na ɔde fɛm, na n’asefoɔ nso yɛ nhyira.

²⁷ Firi bɔne ho na yɛ papa, na woatena hɔ daa;

²⁸ ɛfiri sɛ AWURADE dɔ atɛntenenee, na ɔrennya n’ahotefoɔ. Ɔhwɛ wɔn so daa, na abɔnefoɔ asefoɔ deɛ, wɔbɛyi wɔn hɔ.

²⁹ Ateneneefoɔ bɛtena asase so, na wɔatena so daapem.

³⁰Ɔteneneeni ano ka nyansasɛm, na ne tɛkyerɛma bu atɛntenenee;

³¹ ne Nyankopɔn mmara wɔ n’akomam, na ne nan nwatiri.

³² Ɔbɔnefoɔ tɛ ɔteneneeni, na ɔhwehwɛ sɛ ɔku no.

³³ AWURADE rennya no ne nsam, na sɛ wɔbu no atɛn a, ɔremmu no fɔ.

³⁴ Twɛn AWURADE, na fa ne kwan so, na ɔbɛma wo so, na woanya asase no atena so; sɛ wɔhye abɔnefoɔ ase a, wobɛhunu.

³⁵ Mahunu ɔbɔnefoɔ a ɔdi tumi, na ɔdennane sɛ dua frɔmm a anya asiyɛ,

³⁶ na obi twaa mu no, na hwɛ, ɔnni hɔ, na mehwehwɛɛ no, nanso manhu no.

³⁷ Kari onipa a ɔyɛ pɛ, na hwɛ deɛ ɔtene; sɛ saa onipa no awieeɛ yɛ asomdwoeɛ.

³⁸Na mmaratofoɔ deɛ, wɔbɛsɛe wɔn nyinaa prɛko, abɔnefoɔ ase deɛ, wɔbɛhye.

³⁹ Na ateneneefoɔ nkwagyeɛ firi AWURADE, ɔne wɔn dwanekɔhyɛbea, ahohia da mu.

⁴⁰ Na AWURADE boa wɔn, na ɔgye wɔn, ɔyi wɔn firi abɔnefoɔ nsam, na ɔgye wɔn nkwa, ɛfiri sɛ wɔde wɔn ho to ne so.