Read Twi Asante Nnwom 4 Bible Online

Nnwom 4 - Twi Asante bible

Nnwom 4

¹Wɔde ma dwonkyerɛfoɔ sɛ wɔmfa sankuo nto. Dawid dwom. Me sufrɛ mu gye me so, me tenenee Nyankopɔn. Ahohia mu, woboaa me. Hu me mmɔbɔ, na tie me mpaebɔ.

²Mo mmarima mma, m’animuonyam bɛdane ahohora akɔsi da bɛn? Mobɛdɔ ade hunu, mobɛdi atorɔ akyi akɔsi da bɛn?

³ Na monhunu sɛ AWURADE ayi ne dɔfo asi hɔ; mesu mefrɛ AWURADE a, ɔbɛtie.

⁴ Mo bo fu a, monnyɛ bɔne! Monkasa mo akoma mu wɔ mo daberɛ, na monyɛ komm.

⁵ Mommɔ tenenee afɔdeɛ, na momfa mo ho ntwere AWURADE.

⁶ Nnipa bebree bisa sɛ: Hwan na ɔbɛma yɛahunu papa? AWURADE, te w’anim ma no nhran yɛn so.

⁷Wode anigyeɛ ahyɛ m’akomam asene berɛ a wɔn aburoo ne wɔn nsa dɔɔso no.

⁸ Asomdwoeɛ mu na mɛkɔ makɔda, na mada prɛko, na wo, AWURADE, nko ara na woma metena hɔ dwoodwoo.