Read Twi Asante Nnwom 41 Bible Online

Nnwom 41 - Twi Asante bible

Nnwom 41

¹Wɔde ma dwonkyerɛfoɔ. Dawid dwom. Nhyira ne deɛ ɔdwene mmɔborɔni ho, AWURADE bɛgye no, da bɔne mu.

²AWURADE bɛhwɛ no so, na wama no nkwa, na wɔahyira no asase so. Na worenyi no nhyɛ n’atamfo a wɔpɛ no nsa.

³AWURADE bɛwowa no yadeɛ mpa so; ne yadeɛ a ɔyare da hɔ nyinaa, wodane ma no si no yie.

⁴ Me na mekaa sɛ: AWURADE, hu me mmɔbɔ, sa me kra yadeɛ, na mayɛ wo bɔne!

⁵M’atamfoɔ kasa me ho bɔne sɛ: Da bɛn na ɔbɛwuo na ne din ayera?

⁶Na sɛ ɔba bɛhwɛ me a, ɔka atorosɛm, n’akoma tase nsɛnhunu fa, ɔfiri adi kɔbɔ dawuro.

⁷Wɔn a wɔtane me nyinaa tutu me ho asu, wɔsusu me ho bɔne ka sɛ:

⁸Abusudeɛ akuta no, na afei ɔda hɔ yi, ɔrensɔre bio.

⁹ M’adamfo pa mpo a mede me ho metoo ne soɔ a ɔdii m’aduane bie no, wama ne nantin so atia me.

¹⁰Na wo, AWURADE, hu me mmɔbɔ, na ma me so, na mentua wɔn so ka!

¹¹Yei ho na mɛhunu sɛ wopɛ me: Sɛ m’atamfoɔ renni me so ahurisie.

¹²Na me deɛ, wosɔ me mu ma megyina hɔ, me mu a medie mu, na wode me gyina w’anim pintinn daa.

¹³ Nhyira ne AWURADE, Israel Nyankopɔn, ɛfiri teteete de rekɔ daa. Amen ne Amen.