Read Twi Asante Nnwom 42 Bible Online

Nnwom 42 - Twi Asante bible

Nnwom 42

¹Wɔde ma dwonkyerɛfoɔ. Kora mma nnweneho dwom. Sɛdeɛ ɔforoteɛ pere hwehwɛ nsuwa no, sɛ me kra pere hwehwɛ wo, Onyankopɔn, ne no.

² Onyankopɔn, nkwa Nyankopɔn ho sukɔm de me kra. Da bɛn na mɛba mabɛfiri Nyankopɔn anim?

³ Me nisuo ayɛ me aduane awia ne anadwo, sɛ wɔse me daa sɛ: Wo Nyankopɔn wɔ he?

⁴ Mekae yeinom, na mehwie me kra wɔ me mu, sɛdeɛ me ne asafokuo nante kɔɔ Nyankopɔn fie, na me ne nkurɔfoɔ a wɔnam yuu hyɛ fa no de ayeyie ne aseda nnwom kɔeɛ no.

⁵ Me kra, adɛn na woaboto sɛɛ, na wosi me mu apini? Fa w’ani to Nyankopɔn so na mɛda so mayi no ayɛ, sɛ ɔyɛ m’anim boafoɔ

⁶ne me Nyankopɔn. Me kra aboto wɔ me mu, enti mekae wo, Yordan ne Hermon mmepɔ asase so, Misar bepɔ so.

⁷ Ebunu frɛ ebunu, wo nsuo a ɛworo guo no gyegyeegye no mu, w’asorɔkyeɛ ne w’aworɔ nyinaa abu afa me so.

⁸Adekyeeɛ bi AWURADE bɛyi n’adɔeɛ adi, na anadwo mato no dwom mabɔ me nkwa Nyankopɔn mpaeɛ.

⁹ Mɛbisa me Nyankopɔn ne me botan no, sɛ: Adɛn nti na wo werɛ afiri me? Adɛn nti na ɔtamfoɔ hyɛ a ɔhyɛ me soɔ nti memfa awerɛhoɔ mennanteɛ?

¹⁰Ahohora a m’ahohiahiafoɔ bɔ me no yɛ me sɛ me nnompe redwerɛ, sɛ daa wɔbisa me sɛ: Wo Nyankopɔn wɔ he?

¹¹ Me kra, adɛn na woaboto sɛɛ, na wosi apini wɔ me mu? Fa w’ani to Nyankopɔn so, na mɛda so mayi no ayɛ, sɛ ɔyɛ m’anim boafoɔ ne me Nyankopɔn.