Read Twi Asante Nnwom 49 Bible Online

Nnwom 49 - Twi Asante bible

Nnwom 49

¹Wɔde ma dwonkyerɛfoɔ. Kora mma dwom. Aman nyinaa, montie yei, mo a mote wiase nyinaa, monyɛ aso.

²Nnipa mma mpapahwekwaa oo, mmarima mma a wɔwɔ din oo, adefoɔ ne ahiafoɔ nyinaa.

³M’ano bɛka anyansasɛm, na m’akomam nsusuiɛ yɛ nhunumu ara nko.

⁴ Mɛbrɛ m’aso ase matie abebusɛm, mede sankubɔ mɛkyerɛ me bɛ ase.

⁵Adɛn nti na mensuro nna bɔne mu, nna a m’atɛfoɔ amumuyɛ twa me ho hyia mu?

⁶Wɔde wɔn ho to wɔn ahonyadeɛ so, na wɔde wɔn adedodoɔ hoahoa wɔn ho.

⁷Onua rentumi nnye onipa da, ɔremma Onyankopɔn ne mpatadeɛ,

⁸ na wɔn kra gyeɛ boɔ yɛ den, na ɛma no gya hɔ koraa,

⁹sɛ ɔntena ase ara daa, na wanhunu Adamena.

¹⁰ Na ɔhunu sɛ anyansafoɔ wuwu, na saa nso na nkwasea ne agyimifoɔ sɛeɛ, na wɔgya wɔn ahodeɛ ma ebinom.

¹¹Wɔn tirim ne sɛ wɔn adan bɛtena hɔ daa, na wɔn afie atena hɔ akɔsi awoɔ ntoatoasoɔ so; wɔde wɔn din toto wɔn nsase.

¹² Nanso onipa a ɔwɔ anidie mu no, ɔrentena mu, ɔte sɛ mmoa a wɔyi wɔn hɔ.

¹³Ɔkwan a nkwasea fa soɔ nie, na wɔn a wɔpɛ wɔn anomu asɛm no di wɔn akyi.

¹⁴Wɔboa Asamando sɛ nnwan; Owuo hwɛ wɔn so, na teneneefoɔ bɛtiatia wɔn so anɔpa, na wɔn deɛ, Asamando bɛsɛe wɔn ahoɔfɛ, na wɔannya tenabea bio.

¹⁵ Na me kra deɛ, Onyankopɔn bɛgye no Asamando nsam, na ɔbɛgye me.

¹⁶ Sɛ obi nya ne ho a, nsuro, sɛ ne fie animuonyam redɔɔso a, nsuro,

¹⁷ na ɔwu a, ɔremfa emu biribiara nkɔ, n’animuonyam rensiane nni n’akyi.

¹⁸ Sɛ ɔhyira ne kra ne nkwa berɛ mu, nso wɔyi wo ayɛ sɛ woyɛ wo ho yie a,

¹⁹ɔbɛkɔ n’agyanom abusua mu, wɔrenhunu hann ara da.

²⁰ Onipa a ɔwɔ anidie mu na ɔnni nhunumu no, ɔte sɛ mmoa a wɔyi wɔn hɔ.