Read Twi Asante Nnwom 50 Bible Online

Nnwom 50 - Twi Asante bible

Nnwom 50

¹Asaf dwom. Onyankopɔn, Tweaduampɔn AWURADE rekasa, na ɔfrɛ asase firi owia apueeɛ de kɔsi n’atɔeɛ.

²Sion, ahoɔfɛ a ɛwie pɛyɛ no mu na Onyankopɔn firi hran.

³ Yɛn Nyankopɔn bɛba, na ɔrenyɛ komm. Ogya di n’anim rehye adeɛ, na ahum atu huu atwa ne ho ahyia.

⁴ Ɔrefrɛ ɔsorofoɔ firi ɔsoro aba, ne asase, sɛ ɔrebɛbu ne man atɛn:

⁵ Mommoaboa m’ahotefoɔ ano mma me, wɔn a wɔnam afɔrebɔ so ne me wɔ apam no.

⁶Na ɔsoro bɛka ne tenenee akyerɛ, ɛfiri sɛ Onyankopɔn na ɔrebɛbu atɛn.

⁷Me man, montie, na merebɛkasa; Israel tie, na merebɛdi wo adanseɛ: Me, Onyankopɔn, meyɛ wo Nyankopɔn.

⁸ Ɛnyɛ wo kum afɔdeɛ nti na mɛka w’anim, na wo hyeɛ afɔdeɛ wɔ m’anim daa.

⁹Meremfa wo fie mu nantwinini, wo nnwammuo mu mpapo,

¹⁰ɛfiri sɛ kwaeɛ mu mmoa nyinaa wɔ me, mmepɔ apem so mmoa.

¹¹Menim mmepɔ so ntakraboa nyinaa, na wiram mmoadoma nyinaa wɔ me hɔ.

¹²Sɛ ɛkɔm de me a, anka merense wo, na wiase ne ne mayɛ wɔ me.

¹³Medi anantwinini nam? Na menom mpapo mogya?

¹⁴Bɔ aseda afɔdeɛ ma Onyankopɔn, na tua w’aboadeɛ ma deɛ ɔwɔ ɔsorosoro no;

¹⁵ na frɛ me hiada mu, na mɛgye wo na woahyɛ me animuonyam.

¹⁶ Na ɔbɔnefoɔ deɛ, Onyankopɔn se no sɛ: Adɛn nti na woka m’ahyɛdeɛ, na wode w’ano bɔ m’apam din,

¹⁷na wo korɔ yi ara wokyiri animka, na woto me nsɛm gu w’akyire?

¹⁸ Sɛ wohunu owifoɔ a, wopɛ n’asɛm, na wo ne awaresɛefoɔ bɔ.

¹⁹Wogyaa w’ano mu kɔ bɔne mu, na wo tɛkyerɛma toatoa nnaadaasɛm.

²⁰Wotena ase ka wo nua ho nsɛm, wo na ba mpo, wosopa no.

²¹ Woayɛ yeinom, na mayɛ komm nti, wosusu sɛ mete sɛ wo ara, mɛka w’anim na mede mataataa w’anim.

²²Mo a mo werɛ firi Onyankopɔn no, monnwene yei ho ɛ, na mantete mo asinasini a ɔgyefoɔ biara nni hɔ.

²³Deɛ ɔde aseda bɔ afɔdeɛ no hyɛ me animuonyam, na deɛ n’akwan teeɛ no, mɛkyerɛ no Nyankopɔn nkwagyeɛ.