Read Twi Asante Nnwom 55 Bible Online

Nnwom 55 - Twi Asante bible

Nnwom 55

¹Wɔde ma dwonkyerɛfoɔ sɛ wɔmfa sankuo nto. Dawid nnweneho dwom. Onyankopɔn, yɛ aso tie me mpaebɔ, na nhunta wo ho mfiri me nkotosrɛ ho.

²Wɛn w’aso ma me, na gye me so. M’adwene mu nnwane wɔ m’abooboo mu, na mesi apini,

³ɔtamfoɔ nne ne ɔbɔnefoɔ ahodwan nti. Na wɔbɔ mmusuo gu me so, na wɔde abufuo tane me.

⁴M’akoma pere wɔ me mu, na owuo ho hu agu me so.

⁵Suro ne ahopopoɔ aba me so, na ahoyera akata me so.

⁶ Na mese: O, sɛ mewɔ ntaban sɛ aburuburo deɛ ɛ, anka mɛtu makɔtena baabi.

⁷Aane, anka mɛdwane makɔ akyirikyiri, na makɔtena serɛ so.

⁸Anka mɛyɛ ntɛm madwane mafiri mframa kɛseɛ ne ahum yi mu.

⁹ AWURADE, yɛ wɔn basabasa, paepae wɔn tɛkyerɛma mu, na mahunu amimdie ne aperedie, kuro no mu.

¹⁰Awia ne anadwo wɔnam n’afasuo so twa ho hyia, na amumuyɛ ne ɔhaw wɔ mu.

¹¹Amammɔsɛm wɔ mu, na nhyɛsoɔ ne nnaadaa mpa n’abɔntene so.

¹²Na ɛnyɛ ɔtamfoɔ na ɔbɔ me ahohora, ɛno deɛ, anka mɛtie. Ɛnyɛ deɛ ɔkyiri me na ɔkyerɛ ne ho wɔ me soɔ, anka mede me ho bɛhunta no.

¹³ Na wo dasani a me ne wo bɔ soɔ, me yɔnko ne me manni,

¹⁴wo a wo ne me di atirimusɛm dɛdɛ, na yɛnam yɔɔ kɔ Nyankopɔn fie.

¹⁵Ma owuo nto nsi wɔn so, ma wɔnsiane nkɔ Asamando anikan, na nsɛmmmɔne wɔ wɔn tenabea ne wɔn mu.

¹⁶Me deɛ, mɛsu mafrɛ Onyankopɔn, na AWURADE abɛgye me.

¹⁷Anwummerɛ ne anɔpa ne awigyina na mɛdwene me tirim na masi apini, na ɔbɛte me nne.

¹⁸Wagye me kra asomdwoeɛ mu, na wɔammɛn me, na wɔn a wɔne me anya dɔɔso.

¹⁹ Onyankopɔn bɛte na wabua wɔn. Na ɔno na ɔte hɔ firi teteete. Wɔn deɛ, wɔnsakyera, nanso wɔnsuro Onyankopɔn.

²⁰Ɔtene ne nsa ne nnamfonom so, wabu n’apam so.

²¹ N’anomu nsɛm yɛ fekɔɔ sene bɔta, na ɔko wɔ n’akomam. Ne nsɛm mu dwo bɛtɛɛ sene ngo, nanso ɛyɛ mfena a wɔatwe.

²² Dane w’adesoa to AWURADE so, na ɔbɛsɔ wo mu, ɔremma ɔteneneeni ntwe n’anan mu da.

²³ Na wo, Onyankopɔn, wode wɔn bɛkɔ ɔsɛeɛ amena mu, mogyapɛfoɔ ne nnaadaafoɔ renni wɔn nna fa, na me deɛ, mede me ho meto wo so.