Read Twi Asante Nnwom 60 Bible Online

Nnwom 60 - Twi Asante bible

Nnwom 60

¹Wɔde ma dwonkyerɛfoɔ sɛ wɔnto no “Susan Edut” sankuo nne so. Dawid abebuo dwom. Wɔmfa nkyerɛkyerɛ adeɛ. Ɔtoo no berɛ a ɔne Mesopotamia ne Soba Siriafoɔ koeɛ, na Yoab sane kɔkumm Edomfoɔ mpem dummienu nkyene bɔn mu no. Onyankopɔn, woasum yɛn agu, woabɔ yɛn apansam, wo bo afu; ma yɛn ho mmra yɛn ho bio.

²Woama asase awoso, woapae mu, fa n’asinasini sisi anim, na ɛhinhim.

³ Woama wo man ahunu deɛ ɛyɛ den, woama yɛanom ntintan nsa.

⁴ Wode frankaa ama w’afɛrefoɔ sɛ wɔmfa mma wɔn ho so, nokorɛ nti.

⁵Deɛ ɛbɛyɛ na wɔagye w’adɔfo nti fa wo nifa gye yɛn nkwa, na gye yɛn so.

⁶Onyankopɔn akasa n’ahoteɛ mu: Mɛdi ahurisie, mɛkyɛ Sekem mu, na masusu Sukot bonhwa.

⁷ Gilead wɔ me, na Manase wɔ me, na Efraim yɛ me tiri so dadekyɛ; Yuda yɛ m’ahempoma.

⁸Moab yɛ me dwaresɛn, Edom so na mɛto me mpaboa maguo, me nti, Filistifoɔ asase, teateam.

⁹Hwan na ɔde me bɛkɔ kuro denden no mu, hwan na ɔbɛgya me akɔ Edom?

¹⁰Ɛnyɛ wo, Onyankopɔn, na woasum yɛn aguo yi, na wo, Onyankopɔn, ne yɛn dɔm ankɔ?

¹¹Bɛboa yɛn ahohia mu, na onipa mmoa yɛ ɔkwa.

¹²Yɛde Onyankopɔn na ɛbɛyɛ mmaninneɛ, na ɔno na ɔbɛtiatia yɛn ahohiahiafoɔ soɔ.