Read Twi Asante Nnwom 67 Bible Online

Nnwom 67 - Twi Asante bible

Nnwom 67

¹Wɔde ma dwonkyerɛfoɔ. Dwom a wɔto no asankuo ano. Onyankopɔn, dom yɛn, na hyira yɛn, te w’anim kyerɛ yɛn.

²Na ma wɔnhunu w’akwan wɔ asase so, wo nkwagyeɛ amanaman nyinaa mu.

³ Onyankopɔn, aman bɛyi wo ayɛ, aman nyinaa bɛyi wo ayɛ.

⁴Aman ani bɛgye na wɔato ahosan nnwom, sɛ wobu aman atɛntenenee na wokyerɛkyerɛ asase so aman kwan.

⁵Onyankopɔn, aman bɛyi wo ayɛ, aman nyinaa bɛyi wo ayɛ.

⁶ Asase abɔ n’aduane, Onyankopɔn, yɛn Nyankopɔn bɛhyira yɛn.

⁷ Onyankopɔn bɛhyira yɛn, na wɔn a wɔte asase ano nyinaa asuro no.