Read Twi Asante Nnwom 68 Bible Online

Nnwom 68 - Twi Asante bible

Nnwom 68

¹Wɔde ma dwonkyerɛfoɔ. Dawid sankuo dwom. Ma Onyankopɔn nsɔre na n’atamfo nhwete, na ma wɔn a wɔkyiri no nnwane n’anim.

²Sɛ wisie tu korɔ no, sɛ bɔ wɔn guo ara ne no; sɛ akraa nane ogya ho no, sɛ abɔnefoɔ bɛsɛe Nyankopɔn anim ne no.

³Na teneneefoɔ deɛ, wɔn ani bɛgye, wɔbɛdi Nyankopɔn anim ahurisie na wɔn ho asane wɔn, anigyeɛ mu.

⁴ Monto Nyankopɔn dwom, monto dwom mma ne din, montoto kwan yie mma deɛ ɔte adeɛ so nam ɛserɛ so reba, ne din de AWURADE, na monni n’anim ahurisie.

⁵ Nwisiaa se ne akunafoɔ sɛnnifoɔ ne Onyankopɔn, ne tenabea kronkron mu.

⁶Onyankopɔn ma ɔhokwafoɔ nya mpɔn-ne-mma, ɔtu apokyerɛfoɔ ma wɔbɛdi yie, na mansotwefoɔ deɛ, wɔte nkyɛkyerɛ so.

⁷ Onyankopɔn, wofirii adi dii wo man anim, wofaa ɛserɛ pradada soɔ no,

⁸ asase wosoe, ɔsoro nso sosɔɔ nsuo Nyankopɔn anim, Sinai yi ara wosoe Onyankopɔn, aane, Israel Nyankopɔn, anim.

⁹Onyankopɔn, wotɔɔ adɔeɛ suo guu w’agyapadeɛ so, na ɛtɔ piti a, wo na woma no yɛ yie.

¹⁰W’asafo tenaa so; Onyankopɔn, w’ayamyɛ mu wosiesie maa amanehunufoɔ.

¹¹ AWURADE bɛka n’anomu asɛm, mmaa a wɔka nkonim asɛmpa no asafo so.

¹²Atamfoɔ dɔm ahemfo bɛdwanedwane, na ɔbaa a ɔte fie no akyekyɛ asadeɛ mu.

¹³ Motete nnwammuo ntam a, ɛte sɛ aburuburo ntaban a wɔde dwetɛ agu ho, ne ne ntakra a sika fɛfɛ hran ho.

¹⁴Otumfoɔ bɔ ahemfo gu asase no so a, ɛhoa sɛ nsukyerɛmma Salmon so.

¹⁵Basan mmepɔ yɛ Nyankopɔn mmepɔ, Basan mmepɔ yɛ mmepɔ atentene.

¹⁶ Adɛn na mo mmepɔ atentene mode ani bɔne hwɛ bepɔ a Onyankopɔn pɛ sɛ ɔtena soɔ no? Ampa, AWURADE bɛtena so daa.

¹⁷ Nyankopɔn ko teaseɛnam yɛ mpempem bubuanwea, AWURADE wɔ wɔn mu te sɛ Sinai kronkronbea no mu.

¹⁸ Woaforo kɔ soro, woafa nnommumfoɔ nnommum, woagye nnipa mu ayɛyɛdeɛ, mansotwefoɔ mu mpo, na AWURADE Nyankopɔn atena hɔ.

¹⁹ Nhyira ne AWURADE a ɔsoa yɛn adesoa ma yɛn daa daa, ɔno Onyankopɔn no ne yɛn nkwagyeɛ.

²⁰Ɔno Onyankopɔn no ne yɛn nkwagyeɛ Nyankopɔn, na AWURADE na owuo mu fire wɔ no.

²¹Ampa ara, Onyankopɔn bɛpiepie n’atamfo ti, ɔbɛpie deɛ wasi atimum na ɔkyea n’afodie mu no ti.

²²Na AWURADE aka sɛ: Mɛfa wɔn mafiri Basan maba bio, mede wɔn bɛsane afiri po bunu mu aba,

²³na wode wo nan akeka mogya mu, na w’akraman tɛkyerɛma anya atamfoɔ no ho biribi atafere.

²⁴ Onyankopɔn, wɔhunu w’adi a worebɛfire, me Nyankopɔn ne me hene adi a ɔrebɛfiri, kronkronbea hɔ.

²⁵ Nnwontofoɔ di kan, asankubɔfoɔ di akyire wɔ mmabaa a wɔka mpintin ntam.

²⁶ Monhyira Onyankopɔn, mo asafo ahyiaeɛ mu, mo a mofiri Israel abura mu, monhyira AWURADE.

²⁷Benyamin akumaa, wɔn sodifoɔ, wɔ hɔ, Yuda atitire, wɔn asafohene ahodoɔ, Sebulon atitire ne Naftali atitire wɔ hɔ.

²⁸Wo Nyankopɔn ahyɛ de wo tumi ama wo, Onyankopɔn, hyɛ deɛ woayɛ ama yɛn yi mu den.

²⁹ W’asɔrefie a ɛwɔ Yerusalem nti, ahemfo de ayɛyɛdeɛ bɛbrɛ wo.

³⁰Ka mmɛwa mu aboa ne anantwininikuo ne anantwie mma a ɛyɛ aman no anim, na wɔde dwetɛ mpɔ abɛsom. Pansam aman a wɔpɛ akodie mu.

³¹ Akunini firi Misraim bɛba, Etiopia bɛtene ne nsa ntɛm ama Onyankopɔn.

³²Asase so ahennie, monto Onyankopɔn dwom, monto dwom mma AWURADE.

³³Monto mma deɛ ɔte tete soro mu soro. Hwɛ, ɔma wɔte ne nne a ɛyɛ tumi nne.

³⁴ Momfa tumi mma Onyankopɔn, n’animuonyam kata Israel so, na ne tumi wɔ wiem tɔnn.

³⁵ Nyankopɔn, wo ho yɛ hu, wo tenabea kronkron mu, Israel Nyankopɔn de tumi ne ahoɔden ma ne man. Nhyira ne Onyankopɔn.