Read Twi Asante Nnwom 72 Bible Online

Nnwom 72 - Twi Asante bible

Nnwom 72

¹Salomo deɛ. Onyankopɔn, fa w’atemmuo ma ɔhene, ne wo tenenee ma ɔhene ba.

²Ma no mfa tenenee nni wo man so, na ɔmfa atemmuo nhwɛ w’amanehunufoɔ.

³ Mmepɔ bɛso asomdwoeɛ ama ɔman, na nkokoɔ nso de tenenee aba.

⁴ Ɔbɛbu ɔman mu amanehunufoɔ atɛn, na wagye ahiafoɔ mma nkwa, na wabubu nhyɛsofoɔ mu pasapasa.

⁵Owia ne ɔsrane da so wɔ hɔ yi, wɔbɛsuro wo, awoɔ ntoatoasoɔ nyinaa mu.

⁶Ɔbɛba sɛ osuo a ɛtɔ gu ɛserɛ a wɔahu soɔ so, sɛ osu kɛseɛ a ɛtɔ dwodwo asase mu.

⁷Ɔteneneeni bɛsi frɔmm ne berɛ so, na asomdwoeɛ pii bɛba akɔduru sɛ ɔsrane nni hɔ bio.

⁸ Ɔbɛdi hene afiri po so akɔsi po so, de afiri asubɔnten no so akɔsi asase ano.

⁹ Wɔn a wɔte serɛ so bɛkoto n’anim, na n’atamfo atafere mfuturo.

¹⁰ Tarsis ne nsupɔ mu ahemfo bɛba abɛyɛ ayɛ, Saba ne Seba ahemfo bɛba abɛkyɛ adeɛ.

¹¹ Na ahemfo nyinaa bɛkoto asɔre no, amanaman nyinaa bɛsom no.

¹² Na ɔbɛgye ohiani a ɔsu frɛ no, ne ɔmanehunufoɔ a ɔnni boafoɔ.

¹³Ɔbɛkora ɔbrɛfoɔ ne ohiani, na wagye ahiafoɔ nkwa.

¹⁴ Ɔbɛgye wɔn afiri nhyɛsoɔ ne atirimuɔdensɛm mu, na wɔn mogya boɔ ayɛ den n’anim.

¹⁵ Na ɔbɛnya nkwa, na ɔde Seba sika no bi bɛma no, na ɔno nso bɛbɔ mpaeɛ ama no daa, ahyira no da mu nyinaa.

¹⁶Asase no so aburoofuo bɛduru mmepɔ atifi, ɛso aba bɛwoso sɛ Lebanon, na nkuro no asoa sɛ asase so nwira.

¹⁷ Ne din bɛtena hɔ daa, na owia wɔ hɔ yi ne din asi so, na nnipa de no ahyira wɔn ho, na amanaman nyinaa ahyira no.

¹⁸Nhyira ne AWURADE Nyankopɔn, Israel Nyankopɔn a ɔno nko yɛ anwanwadeɛ,

¹⁹ na nhyira ne n’animuonyam din daa, na n’animuonyam nhyɛ asase nyinaa ma. Amen ne Amen.

²⁰Yisai ba Dawid mpaebɔ asa.