Read Twi Asante Nnwom 77 Bible Online

Nnwom 77 - Twi Asante bible

Nnwom 77

¹Wɔde ma dwonkyerɛfoɔ Yedutun. Asaf dwom. Mɛma me nne so makyerɛ Onyankopɔn, na masu mafrɛ no; mɛma me nne so makyerɛ Onyankopɔn, na ɔbɛyɛ aso ama me.

²M’ahohia da mu na mehwehwɛɛ AWURADE, me nsam atene anadwo nyinaa, na ɛmpa aba, me kra po awerɛkyekyerɛ.

³Mekae Onyankopɔn a, mesi apini, medwene a, me honhom tɔ piti.

⁴Wokura m’anisuatɛtɛ mu, ɛpempem me, na mentumi menkasa.

⁵ Medwene tete nna no, tete mmerɛ no mu mfeɛ.

⁶Mekae m’anadwo dwom, medwene m’akomam, na me honhom hwehwɛm pɛsɛpɛsɛ.

⁷ AWURADE bɛto atwene daa, na ɔrennom bi bio anaa?

⁸N’adɔeɛ awie mutwa koraa anaa? N’asɛm a ɔkaeɛ no asa ama awoɔ ntoatoasoɔ nyinaa anaa?

⁹Onyankopɔn werɛ afiri adom, anaasɛ ɔde abufuo atwe ne mmɔborɔhunu ato ne yam?

¹⁰Ɛnna mese: Me dadwene a ɛda me soɔ ne sɛ, ɔsorosoroni no nifa asakyera.

¹¹Mɛkae AWURADE nneyɛɛ maka, aane, mɛkae wo tete anwanwadeɛ,

¹²na masusu w’adwuma nyinaa ho, na madwene wo nneyɛɛ ho.

¹³ Onyankopɔn, wo kwan wɔ kronkronyɛ mu, hwan na ɔyɛ nyame kɛseɛ sɛ Onyankopɔn?

¹⁴Wone Onyankopɔn a woyɛ anwanwadeɛ, woama wɔahunu wo tumi, aman mu.

¹⁵Wode wo nsa na agye wo man, Yakob ne Yosef mma no.

¹⁶Asuasu hunuu wo, Onyankopɔn, asuasu hunuu wo, na wɔbɔɔ binim, abunu nso wosowosoe.

¹⁷Amununkum tɔɔ osuo bibibibi, ewiem tɔnn gyegyee, w’agyan nso pepaa anyinam,

¹⁸w’aprannaa boboom, ahum a ɛdi kyinhyia mu. Anyinam hyerɛn wiase, asase popoe na ɛwosoe.

¹⁹Wo kwan faa ɛpo mu, na wo tempɔn nsuo pii mu, na wɔanhunu w’anammɔn.

²⁰ Wonam Mose ne Aaron nsa so bɛgyaa wo man sɛ nnwankuo.