Read Twi Asante Nnwom 78 Bible Online

Nnwom 78 - Twi Asante bible

Nnwom 78

¹Asaf nnweneho dwom. Me man, monyɛ aso mma me nkyerɛkyerɛ, monwɛn mo aso mma m’anomu nsɛm.

² Mɛbue m’ano mmebuo mu, mɛyi atetesɛm adi sɛ akasabebuo.

³ Deɛ yɛateɛ na wɔama yɛahunu na yɛn agyanom aka akyerɛ yɛn no,

⁴yɛremfa nhunta wɔn mma, yɛreka nkyirimma AWURADE ayeyisɛm, ne ne tumidie, ne n’anwanwadeɛ a wayɛ no.

⁵Ɔde adanseɛ tintim Yakob mu, na ɔhyɛɛ mmara Israel mu, ɛno na ɔde hyɛɛ yɛn agyanom sɛ wɔmma wɔn mma nhunu,

⁶na nkyirimma, mma a wɔbɛwo wɔn no, ahunu, na wɔsi so a, wɔaka akyerɛ wɔn mma,

⁷sɛ wɔmfa wɔn ani nto Nyankopɔn so, na wɔn werɛ mmfiri Nyankopɔn nneyɛɛ, na wɔnni ne mmara nsɛm so.

⁸ Na wɔanyɛ sɛ wɔn agyanom, mma asoɔdenfoɔ ne atuatefoɔ, mma a wɔmfa wɔn akoma nsi tee, na wɔn honhom nni Nyankopɔn nokorɛ.

⁹Efraim mmabanin, taduakurafoɔ, bɛmmatofoɔ, wɔdane wɔn ani ɔko da.

¹⁰Wɔanni Nyankopɔn apam so, na ne mmara nso, wɔampɛ sɛ wɔnante mu.

¹¹Na wɔn werɛ firii ne nneyɛɛ ne n’anwanwadeɛ a ɔde kyerɛɛ wɔn no.

¹² Ɔyɛɛ anwanwadeɛ wɔn agyanom anim, Misraim asase so, Soan petee mu.

¹³ Ɔpaee ɛpo mu de wɔn twaa mu, na ɔmaa nsuo gyinaa sɛ ekuo.

¹⁴ Ɔde mununkum gyaa wɔn awia, na anadwo nyinaa ɔde ogya kanea nso gyaa wɔn.

¹⁵ Ɔpaee abotan mu ɛserɛ so, na ɔmaa wɔnom sɛ asukɛseɛ.

¹⁶Ɔmaa nsubɔntene firii ɔbotan mu bae, na ɔmaa nsuo senee sɛ asutene.

¹⁷Nanso wɔkɔɔ so ara yɛɛ no bɔne, tee ɔsorosoroni no anim atua anwea pradada so.

¹⁸ Na wɔsɔɔ Onyankopɔn hwɛe wɔn akoma mu, bisaa no aduane sɛdeɛ wɔn kɔn dɔeɛ,

¹⁹na wɔkasa tiaa Onyankopɔn sɛ: Onyankopɔn bɛtumi ato pono ɛserɛ so anaa?

²⁰Hwɛ, ɔbɔɔ ɔbotan ma nsuo tui, na asubɔnten senee; paanoo nso, ɔbɛtumi ama, na wapɛ nam ama ne man anaa?

²¹ Enti AWURADE teeɛ no, ne bo fui, na ogya sɔɔ Yakob mu, na abufuo nso sɔre tiaa Israel,

²²ɛfiri sɛ wɔannye Onyankopɔn anni, na wɔamfa wɔn ho anto ne nkwagyeɛ so.

²³Nanso ɔhyɛɛ ewiem tɔnn ɔsoro, na ɔhinii ɔsoro apono,

²⁴ na ɔtɔɔ mana guu wɔn so sɛ wɔnni, na ɔde ɔsoro aduane maa wɔn.

²⁵Atumfoɔ aduane na onipa diiɛ, ɔmaa wɔn aduane di mee.

²⁶Ɔmaa apueeɛ mframa bɔe ɔsoro, na ɔde ne tumi twee anafoɔ mframa bae,

²⁷na ɔtɔɔ nam guu wɔn so sɛ mfuturo, ne ntakraboa sɛ mpoano anwea.

²⁸Na ɔmaa wɔtotɔɔ wɔn nsraban mu de twaa wɔn tenabea ho hyiae.

²⁹Na wɔdi mee boroo so, ɛfiri sɛ ɔmaa wɔn wɔn akɔnnɔdeɛ.

³⁰Wɔnnya nnyaee wɔn akɔnnɔ no, wɔn aduane da so wɔ wɔn anomu no,

³¹ Nyankopɔn abufuo sɔre tiaa wɔn, na ɔkunkumm wɔn mu abrane no mu bi, na ɔde Israel mmeranteɛ hwehwee fam.

³²Yei nyinaa mu na wɔkɔɔ so yɛɛ bɔne, na wɔannye n’anwanwadeɛ no anni.

³³ Enti ɔmaa wɔn nna yeraa sɛ ahuro, ne wɔn mfeɛ ehu mu.

³⁴Ɔreku wɔn no, na wɔhwehwɛɛ no, na wɔsane bɛpɛɛ Nyankopɔn akyiri kwan ntɛm,

³⁵na wɔkaee sɛ Onyankopɔn ne wɔn botan, na ɔsorosoro Nyankopɔn ne wɔn gyefoɔ.

³⁶Wɔde wɔn ano dɛfɛdɛfɛɛ no, na wɔde wɔn tɛkyerɛma dii atorɔ kyerɛɛ no,

³⁷na wɔn akoma deɛ, ɛntim ne ho, na wɔanni n’apam mu nokorɛ.

³⁸Na ɔno deɛ, ɔyɛ ntimmɔborɔ nti, ɔkataa wɔn amumuyɛ so, na wansɛe nnipa; na ɔtaa sianka n’abufuo, na wanhwanyan n’awerɛhoɔ nyinaa.

³⁹ Na ɔkaee sɛ wɔyɛ ɔhonam, mframa a ɛkorɔ na ɛnsane n’akyiri bio.

⁴⁰ Mprɛ ahe ara na wɔante n’anim atua ɛserɛ soɔ, na wɔanho ne werɛ anwea pradada soɔ!

⁴¹Na wɔsane sɔɔ Onyankopɔn hwɛe, na wɔyii Israel Kronkronni no ahi.

⁴²Wɔankae ne tumi, da a ɔyii wɔn firii ɔhohiahiafoɔ nsam,

⁴³ na ɔyɛɛ ne nsɛnkyerɛnneɛ Misraim ne n’anwanwadeɛ, Soan petee mu no.

⁴⁴ Ɔdanee wɔn nsubɔntene mogya, na wɔantumi annom wɔn nsuwansuwa.

⁴⁵ Ɔsomaa ahuriiɛ bɛguu wɔn so maa wɔbɛwee wɔn, ne mponkyerɛne maa wɔbɛsɛee wɔn.

⁴⁶ Ɔde wɔn nnɔbaeɛ maa mmɛbɛ, na ɔde wɔn adwumadeɛ maa ntutummɛ.

⁴⁷ Ɔde asukɔtweaa sɛee wɔn bobe, na ɔde nsukyenkyeneeɛ bɔɔ wɔn akyee nnua,

⁴⁸na ɔyii wɔn afieboa maa asukɔtweaa, ne wɔn mmoakuo maa asraman.

⁴⁹Ɔtoo n’abufuo hyehyeɛ no guu wɔn so, anibereɛ, ahi ne ahohia, abɔfoɔ bɔne a ɔsomaa wɔn baa wɔn soɔ no.

⁵⁰ Ɔbɔɔ kwan maa n’abufuo, wankora wɔn kra amfiri owuo mu, na ɔyii wɔn nkwa maa owuyadeɛ.

⁵¹ Na ɔkumm Misraim mmakan nyinaa, wɔn ahoɔden asefire, Ham ntomadan mu.

⁵² Na ɔgyaa ne man sɛ nnwan, na ɔkaa wɔn sɛ mmoakuo, ɛserɛ so,

⁵³ na ɔgyaa wɔn dwoodwoo kɔe na wɔansuro, na wɔn atamfoɔ deɛ, ɛpo no kataa wɔn so.

⁵⁴ Na ɔde wɔn baa ne kronkronbea hyeɛ so, bepɔ a ne nsa nifa gyeeɛ no so.

⁵⁵Ɔpampamm amanaman, wɔn anim, na ɔtwee wɔn awunnyadeɛ so ntonto kyɛɛ no homa so, na ɔmaa Israel mmusuakuo tenatenaa wɔn ntomadan mu.

⁵⁶Nanso wɔsɔɔ ɔsorosoro Nyankopɔn hwɛe tee no atua, na n’adansesɛm no, wɔanni so.

⁵⁷ Na wɔwae twaa nkontompo sɛ wɔn agyanom, wɔmanee sɛ tadua daadaafoɔ.

⁵⁸ Wɔde wɔn sorɔnsorɔmmea huruu ne bo, na wɔde wɔn ahoni maa no twee ninkunu.

⁵⁹Onyankopɔn tee, na ne bo fui, na Israel ho yɛɛ no nwunu koraa.

⁶⁰ Na ɔgyaa Silo tenabea no, ntomadan a ɔsii nnipa mu no.

⁶¹Ɔde n’ahoɔden hyɛɛ nnommumfa mu, na ɔde n’animuonyam hyɛɛ ɔtamfoɔ nsa.

⁶²Ɔgyaa ne man maa nkrantɛ, na ne bo fuu n’agyapadeɛ.

⁶³Ogya hyee wɔn mmeranteɛ, na wɔn mmabaa nso, wɔanto wɔn ayeforɔ dwom.

⁶⁴ Wɔn asɔfoɔ totɔɔ nkrantɛ ano, na wɔn akunafoɔ annya asuyɛ.

⁶⁵Na AWURADE nyanee sɛ obi a ɔfiri nna mu, sɛ ɔkatakyie a nsa ma no huro,

⁶⁶na ɔbobɔɔ n’atamfo maa wɔsanee wɔn akyi, ɔbɔɔ wɔn daa adapaa.

⁶⁷ Nso wampɛ Yosef ntomadan no, na Efraim abusuakuo no, wamfa;

⁶⁸ na mmom ɔfaa Yuda abusuakuo, Sion bepɔ a wadɔ no no.

⁶⁹Na ɔsii ne kronkronbea sɛ ɔsoro sɛ asase a ɔde atim hɔ daa no.

⁷⁰ Na ɔyii n’akoa Dawid, na ɔfaa no firii nnwammuo mu.

⁷¹ Ɔmaa no firii nnwammereɛ a wɔma nufoɔ akyiridie bae, sɛ ɔmmɛyɛne ne man Yakob ne n’agyapadeɛ Israel.

⁷²Na ɔyɛnee wɔn akoma mudie so, na ɔde ne nsam nimdeɛ kyerɛɛ wɔn kwan.