Read Twi Asante Nnwom 80 Bible Online

Nnwom 80 - Twi Asante bible

Nnwom 80

¹Wɔde ma dwonkyerɛfoɔ sɛ wɔnto no “Sonannim Edut” sankuo nne so. Asaf adansedie. Dwom. Israel dwanhwɛfoɔ, yɛ aso, wo a woka Yosef sɛ nnwankuo, wo a wote Kerubim soɔ, pue hran.

²Efraim ne Benyamin ne Manase anim na ma wo homene soɔ, na bra bɛgye yɛn.

³ Onyankopɔn, ma yɛnsane mmra, na ma w’anim nhyerɛn na yɛanya nkwa.

⁴AWURADE, asafo Nyankopɔn, wo bo bɛfu atia wo man mpaebɔ akɔsi da bɛn?

⁵ Wode nisuo yɛɛ aduane maa wɔdii, na wode nisuo maa wɔnomee.

⁶Wode yɛn yɛɛ ntɔkwa maa wɔn a wɔtete yɛn ho, na yɛn atamfoɔ sereseree wɔ wɔn mu.

⁷ Asafo Nyankopɔn, ma yɛnsane mmra, na ma w’anim nhyerɛn na yɛanya nkwa.

⁸ Wotuu obobe firii Misraim bae, wotutuu amanaman na wobɛtɛe.

⁹Woyii n’anim kwan, na ɛgyee nhini, na ɛyɛɛ asase ma.

¹⁰Ne nwunu kataa mmepɔ so, na ne nhoma kataa Nyankopɔn tweneduro so.

¹¹Ɛbaebaee ne mman mu kɔduruu ɛpo ho, na n’abasa frɔmfrɔm kɔɔ asubɔnten no ho.

¹² Adɛn nti na woabubu ne ban, ma wɔn a wɔnam kwan soɔ nyinaa tete no yi?

¹³Kwaeɛm kɔkɔte sɛe no, na petee mu mmoa we.

¹⁴Asafo Nyankopɔn, sane w’akyiri ɛ! Brɛ w’ani ase firi soro hwɛ, na bɛhwɛ obobe yi,

¹⁵na bɛwowa deɛ wo nifa tɛeɛ no, ne ɔba a woafa no ayɛ wo deɛ no pintinn.

¹⁶Wɔde ogya ahye no, wɔatwitwa no, w’anim ateatea nti wɔresɛe.

¹⁷Fa wo nsa kata wo nifa nipa no so, onipa ba a woafa no ayɛ wo deɛ pintinn no so,

¹⁸na yɛrentwe mfiri wo nkyɛn. Ma yɛnnya nkwa, na yɛmmɔ wo din.

¹⁹ AWURADE, asafo Nyankopɔn, ma yɛnsane mmra, ma w’anim nhyerɛn na yɛanya nkwa.