Read Twi Asante Nnwom 84 Bible Online

Nnwom 84 - Twi Asante bible

Nnwom 84

¹Wɔde ma dwonkyerɛfoɔ sɛ wɔnto no Gatfoɔ sankuo nne so. Kora mma dwom. Sɛdeɛ wo tenabea hɔnom si yɛ fɛ, asafo AWURADE.

² Me kra ani gyina, ɛtɔ piti mpo, AWURADE adihɔ no nti, m’akoma ne me honam di ahurisie ma Onyankopɔn teasefoɔ.

³ Nso apatuprɛ anya ɛdan, na asomfenakatakyi anya ebuo a ɔbɛto ne mma agu mu, ɛne w’afɔrebukyia no, asafo AWURADE, me Hene ne me Nyankopɔn.

⁴ Nhyira ne wɔn a wɔte wo fie, wɔbɛkɔ so ayi wo ayɛ.

⁵Nhyira ne onipa a n’ahoɔden wɔ wo mu, na Sion atempɔn no wɔ n’akomam.

⁶Wɔtwam nisuo bɔn no mu a, wɔdanedane no deɛ mmasuo wɔ, bereamporɔsuo nso de nhyira pii kata so.

⁷Wɔnante firi ahoɔden mu kɔ ahoɔden mu bɛpue Nyankopɔn anim, Sion.

⁸AWURADE, asafo Nyankopɔn, tie me mpaebɔ, yɛ aso, Yakob Nyankopɔn!

⁹ Yɛn kyɛm, Onyankopɔn, hwɛ, na hwɛ deɛ woasra no no anim.

¹⁰ Na wo fie dakorodie yɛ sene nna apem. Mepɛ me Nyankopɔn fie nammɔnnampan mu tena mmom sene sɛ mɛtena abɔnefoɔ ntomadan mu.

¹¹ Na owia ne kyɛm ne AWURADE Nyankopɔn. AWURADE ma adom ne animuonyam, ɔmfa papa nkame wɔn a wɔnam tee no.

¹²Asafo AWURADE, nhyira ne onipa a ɔde ne ho to wo soɔ.