Read Twi Asante Nnwom 85 Bible Online

Nnwom 85 - Twi Asante bible

Nnwom 85

¹Wɔde ma dwonkyerɛfoɔ. Kora mma dwom. AWURADE, woadom w’asase, wode Yakob agyapadeɛ asane aba,

² wode wo man mfomsoɔ akyɛ, woakata wɔn bɔne nyinaa so.

³Woatwe w’anibereɛ nyinaa, woadane afiri w’abufuo hyehyeɛ no mu.

⁴Yɛn nkwagyeɛ Nyankopɔn, ma yɛnsane mmra, na twa wo bo a ɛfu yɛn no to wo yam.

⁵ Wo werɛ bɛho atia yɛn akɔsi daa anaa? Wobɛtwe w’abufuo mu akɔ awoɔ ntoatoasoɔ a ɛdidi soɔ mu?

⁶Worensane mma yɛn nkwa, na wo man ani nnye wo ho?

⁷AWURADE, ma yɛnhunu w’adɔeɛ, na fa wo nkwagyeɛ ma yɛn.

⁸ Mɛtie deɛ Onyankopɔn AWURADE bɛka. Ampa, ɔka asomdwoeɛsɛm kyerɛ ne man ne n’ahotefoɔ, na mma wɔnnsane nnkɔ nkwaseadeɛ mu.

⁹Ampa ara, ne nkwagyeɛ bɛn wɔn a wɔsuro no, na animuonyam atena yɛn asase so.

¹⁰Adom ne nokorɛ bɛhyia, na tenenee ne asomdwoeɛ adi mfeano.

¹¹Nokorɛ bɛfifiri asase so, na tenenee afiri soro ahwɛ.

¹²Nso AWURADE bɛma papa, na yɛn asase bɛma ne nnɔbaeɛ.

¹³Tenenee bɛdi n’anim, na asi n’anammɔn kwan so.