Read Twi Asante Nnwom 89 Bible Online

Nnwom 89 - Twi Asante bible

Nnwom 89

¹Esrahini Etan nnweneho dwom. Mɛto AWURADE adɔeɛ ho dwom daa, mede m’ano bɛka wo nokorɛdie makyerɛ awoɔ ntoatoasoɔ a ɛdidi soɔ;

²na mɛka sɛ: Adɔeɛ bɛsi so daa, ɔsoro hɔ na wode nokorɛdie atintim.

³ Me ne deɛ mayi no no apam apam bi, maka ntam makyerɛ m’akoa Dawid:

⁴Mɛma w’asefoɔ atim akɔsi daa, na mama w’ahennwa asi so akɔduru awoɔ ntoatoasoɔ a ɛdidi soɔ so.

⁵Na ɔsoro yi wo, AWURADE, anwanwadeɛ ayɛ, ne wo nokorɛ nso wɔ akronkronfoɔ asafo mu.

⁶ Na hwan na ɔwɔ wiem a wɔde no bɛto AWURADE ho, hwan na ɔsɛ AWURADE, anyame mma mu?

⁷Onyankopɔn a ne ho yɛ hu, akronkronfoɔ dwabɔ kɛseɛ no mu, na wɔsuro no sene wɔn a wɔatwa ne ho ahyia nyinaa.

⁸ AWURADE, asafo Nyankopɔn, hwan na ɔte sɛ woɔ? Otumfoɔ AWURADE, wo nokorɛdie atwa wo ho ahyia.

⁹ Wo na wodi ɛpo mfumpaabuo soɔ, sɛ n’asorɔkyeɛ sɔre a, wo na wodwodwo ano.

¹⁰ Wo na woabubu Rahab pasaa sɛ ɔtɔfoɔ, wode wo tumi nsa abɔ w’atamfo apansam.

¹¹ Ɔsoro wɔ wo, asase nso wɔ wo; wiase ne ne mayɛ, wo na wohyɛɛ aseɛ.

¹²Atifi fam ne anafoɔ fam, wo ara na wobɔeɛ, Tabor ne Hermon di wo din mu ahurisie.

¹³Tumi basa ne mmarimayɛ wɔ wo, wo nsa yɛ den, wɔama wo nifa so.

¹⁴ Tenenee ne atemmuo ne w’ahennwa nnyinasoɔ, adɔeɛ ne nokorɛ gyina w’anim.

¹⁵Nhyira ne ɔman a wɔnim osebɔ na wɔnante wo, AWURADE, anim hann mu.

¹⁶Wo din mu na wɔn ho bɛsɛpɛ wɔn daa nyinaa, na wo tenenee mu na wɔama wɔn soɔ.

¹⁷Na wɔn ahoɔden ahyehyɛdeɛ ne wo, na w’adom mu na wɔama yɛn abɛn soɔ.

¹⁸ Na AWURADE na yɛn kyɛm wɔ no, na Israel Kronkronni no na yɛn hene wɔ no.

¹⁹ Da bi wokasaa anisoadehunu mu kyerɛɛ w’ahotefoɔ sɛ: Madi maboa ɔbarima bi, mama obi a wɔayi no firi ɔman no mu so.

²⁰ Mahunu m’akoa Dawid, mede me ngo kronkron masra no.

²¹Ɔno na me nsa bɛma no atim, na me basa nso ahyɛ no den.

²²Ɔtamfoɔ bi rensisi no, na obusuyɛfoɔ bi renhyɛ no so.

²³Na mɛbubu n’anim ahohiahiafoɔ, na mabobɔ wɔn a wɔtane no.

²⁴ Na me nokorɛdie ne m’adɔeɛ ne no bɛtena, na me din mu na wɔbɛma n’abɛn soɔ.

²⁵ Na mede ne nsa bɛsi po mu, na mede ne nifa masi nsubɔntene so.

²⁶ Ɔno deɛ, ɔbɛfrɛ me sɛ: Wone m’agya, me Nyankopɔn ne me nkwagyeɛ botan!

²⁷Na me nso mede no bɛyɛ m’abakan, asase so ahemfo mu pumpuni.

²⁸ Mɛkora m’adɔeɛ mama no daa, na m’apam atim hɔ ama no.

²⁹Mɛma n’asefoɔ atena hɔ daa, ne n’ahennwa sɛ ɔsoro nna.

³⁰Sɛ ne mma gya me mmara na wɔnnante m’atemmudeɛ mu,

³¹sɛ wɔgu m’ahyɛdeɛ ho fi na wɔnni me mmaransɛm so a,

³²ɛno deɛ mede abaa bɛba abɛtwe wɔn aso, wɔn mmarato ho, na mede ɔhaw ahodoɔ mabɛtwe wɔn aso, wɔn amumuyɛ ho.

³³Na m’adɔeɛ deɛ, merenyi memfiri ne ho, na merenyɛ me nokorɛdie no ho nsakyirinsayam.

³⁴Merengu m’apam ho fi, na merensakyera deɛ afiri m’anomu no.

³⁵Maka me kronkronyɛ ho ntam baako, merenni Dawid hwammɔ.

³⁶ N’asefoɔ bɛtena hɔ daa, na n’adwa ayɛ m’anim sɛ owia.

³⁷ Ɛbɛtim hɔ sɛ ɔsrane daa, sɛ ɔdanseni nokwafoɔ a ɔwɔ wiem.

³⁸ Na wo ara deɛ, woato atwene na ayɛ wo nwunu, na woafa deɛ woasra no no abufuo.

³⁹Woapo w’akoa apam, woagu n’abotire ho fi de ato fam.

⁴⁰Woadwiri ne ban nyinaa agu, woama n’aban akɛseɛ ayɛ agoago.

⁴¹ Wɔn a wɔtwam ɔkwan no soɔ nyinaa fom no fa, wayɛ ahohora ama wɔn a wɔtete ne ho.

⁴²Woama n’ahohiahiafoɔ nifa so, woama n’atamfo nyinaa ani agye.

⁴³Aane, woadane n’afena ano nso, na woamma no annyina ɔsa mu.

⁴⁴Woama n’animuonyam apa, na woato n’adwa atwene fam.

⁴⁵Woatwa ne mmeranteberɛ nna so, wode aniwuo abum ne so.

⁴⁶ Ɛnkɔsi da bɛn, AWURADE, na wode wo ho bɛhunta daa ama w’abufuo adɛre sɛ ogya?

⁴⁷ Kae me nna tiaa a ɛyɛ: Ade hunu yi ara nti na wobɔɔ nnipa mma nyinaa?

⁴⁸Ɔdasani bɛn na ɔte ase a ɔrenhunu owuo, na ɔbɛyi ne kra afiri Asamando nsam?

⁴⁹ Ɛhe na wo kane adɔeɛ no wɔ, AWURADE, deɛ wokaa ho ntam kyerɛɛ Dawid, wo nokorɛ mu no?

⁵⁰AWURADE, kae wo nkoa ahohora a ɛfiri aman dodoɔ no nyinaa mu a ɛda me koko soɔ.

⁵¹AWURADE, w’atamfo bɔ ahohora, wɔbɔ deɛ woasra no no anammɔn ahohora!

⁵² Nhyira nka AWURADE daa. Amen ne Amen.