Read Twi Asante Nnwom 9 Bible Online

Nnwom 9 - Twi Asante bible

Nnwom 9

¹Wɔde ma dwonkyerɛfoɔ sɛ wɔnto no “Mut labben! sankuo nne so”. Dawid dwom. Mede m’akoma nyinaa mɛda AWURADE ase; AWURADE, mɛka w’anwanwadeɛ nyinaa akyerɛ.

²Mɛgye m’ani na madi ahurisie wɔ wo mu, mɛto wo a wowɔ sorosoro no din ayeyie dwom.

³Ɛfiri sɛ m’atamfoɔ asane wɔn akyi, wɔatotɔ, na wɔayera w’anim.

⁴ Woatena atemmuo adwa so abu atɛn tenenee, Woadi m’asɛm abu me bem.

⁵Woateatea amanaman, woasɛe abɔnefoɔ, woapepa wɔn din korakorakora.

⁶ Atamfoɔ awie sa adane daa amamfo, na woama nkuro ase ahye, na wɔn ho nkaeɛ ayera.

⁷ Na AWURADE deɛ, ɔte n’ahennwa so daa, ɔde n’adwa asi hɔ rebu atɛn.

⁸ Ɔno na ɔbɛbu wiase atɛn tenenee mu, na wadi aman asɛm tenenee mu.

⁹AWURADE bɛyɛ dwanekɔbea ama deɛ wɔrepɛkyɛ no, ahokyere berɛ mu dwanekɔbea.

¹⁰Na wɔn a wɔnim wo din de wɔn ho bɛto wo so, ɛfiri sɛ woannya wɔn a wɔhwehwɛ wo, AWURADE.

¹¹ Monto ayeyie dwom mma AWURADE a ɔte Sion, monka ne nneyɛɛ nkyerɛ aman mu,

¹² sɛ, deɛ ɔtɔ mogya so were no akae wɔn, na ne werɛ amfiri abrɛfoɔ nteamu.

¹³AWURADE, hu me mmɔbɔ, hwɛ m’amaneɛ a ɛfiri m’atamfoɔ, wo a woma me so firi owuo aboboano,

¹⁴ na menka w’ayeyie nyinaa menkyerɛ, Sion babaa aponkɛseɛ mu, na menni ahurisie wo nkwagyeɛ mu.

¹⁵ Amanaman amemmem amena a wɔtuiɛ no mu, afidie a wɔsum huntaeɛ no ayi wɔn nan.

¹⁶ AWURADE ayi ne ho adi, wabu atɛn, ɔde ɔbɔnefoɔ nsam nneyɛɛ atoatoa no.

¹⁷Abɔnefoɔ bɛsane akɔ Asamando, amanaman a wɔn werɛ afiri Onyankopɔn nyinaa.

¹⁸ Na ɛnyɛ daa na ne werɛ bɛfiri ohiani, na ɛnyɛ daa na mmɔborɔni anidasoɔ bɛyera.

¹⁹AWURADE, sɔre, mma ɔdasani nnni nim, ma wɔmmu amanaman atɛn w’anim.

²⁰ AWURADE, yi wɔn hu, na amanaman nhunu sɛ wɔyɛ adasamma.