Read Twi Asante Nnwom 92 Bible Online

Nnwom 92 - Twi Asante bible

Nnwom 92

¹Dwom a wɔto no homeda. Ɛyɛ sɛ wɔda AWURADE ase na wɔto dwom ma wo din, ɔsorosoroni,

²sɛ wɔka w’adɔeɛ anɔpa ne wo nokorɛdie anadwo,

³ sankuhan du ne bɛnta so, sankuo ho adwempa dwom mu.

⁴Na wo, AWURADE, woma m’ani gye wo nneyɛɛ ho, wo nsa ano nnwuma ho na mɛdi ahurisie.

⁵ AWURADE, sɛdeɛ wo nnwuma si soso fa, w’adwene mu dɔ pii.

⁶Ogyimifoɔ nnim, na ɔkwasea nhunu yei mu.

⁷ Abɔnefoɔ fifiri sɛ ɛfan na amumuyɛfoɔ nyinaa si so sɛ nhwiren a, ɛne sɛ wɔbɛsɛe wɔn korakora.

⁸ Nanso wo AWURADE deɛ, wokorɔn daa.

⁹Na hwɛ, w’atamfo no, Ao AWURADE, w’atamfo no deɛ, wɔbɛsɛe, na wɔbɛhwete amumuyɛfoɔ nyinaa mu.

¹⁰ Na woma m’abɛn so sɛ okoo deɛ, wode ngo foforɔ gu me so.

¹¹ Na m’ani hunu deɛ mepɛ m’atɛfoɔ so, na m’aso te deɛ ɛyɛ me dɛ, abɔnefoɔ a wɔsɔre tia me no ho.

¹² Ɔteneneeni bɛfefɛ sɛ abɛ, ɔbɛnyini sɛ Lebanon so tweneduro.

¹³ Wɔn a wɔatɛ wɔn AWURADE fie no bɛfefɛ yɛn Nyankopɔn abannwa so.

¹⁴ Wɔbɛkɔ so aso aba nkɔkoraaberɛ, wɔbɛyɛ akɛseɛ ne frɔmfrɔm ara

¹⁵ de akyerɛ sɛ AWURADE tene, ɔne me botan, na deɛ ɛntene biara nni ne mu.