Read Twi Asante Mmebusɛm 10 Bible Online

Mmebusɛm 10 - Twi Asante bible

Mmebusɛm 10

¹ Salomo mmebusɛm. Ɔba nyansafoɔ ma n’agya ani gye, na ɔba kwasea deɛ ɔhyɛ ne na awerɛhoɔ.

²Ɔbɔnefoɔ akoradeɛ nyɛ mfasoɔ biara, na tenenee gye onipa firi owuo mu.

³ AWURADE mma ɛkɔm nne ɔteneneeni kra, na abɔnefoɔ adepɛ deɛ, ɔka gu.

⁴ Ohia bɛhia deɛ ɔtwentwɛn ne nsa aseɛ, na nsiyɛfoɔ nsa ma wɔnya wɔn ho.

⁵Deɛ ɔboaboa ano ahuhuberɛ no yɛ ɔba nyansafoɔ, na deɛ ɔtɔ nko twaberɛ no yɛ ɔba a ɔhyɛ aniwuo.

⁶Nhyira da ɔteneneeni atifi, na akakabensɛm kata abɔnefoɔ ano.

⁷ Ɔteneneeni nkaeɛ yɛ nhyira, na abɔnefoɔ din bɛporɔ.

⁸Akoma mu nyansafoɔ gye mmara nsɛm, na ogyimifoɔ kurokurofoɔ bɛhwe ase.

⁹Deɛ ɔnam pɛyɛ mu no nam dwoodwoo, na deɛ ɔkyea n’akwan no, wɔbɛhu no.

¹⁰ Deɛ ɔbu ani no yi awerɛhoɔ, na ogyimifoɔ kurokurofoɔ bɛhwe ase.

¹¹ Ɔteneneeni ano yɛ nkwa nsutire, na akakabensɛm kata abɔnefoɔ ano.

¹² Ɔtane hwanyan ntɔkwa, na ɔdɔ kata mfomsoɔ nyinaa so.

¹³Nhunumufoɔ anomu na wɔhunu nyansa, na abaa fata deɛ ɔnni tire akyi.

¹⁴Anyansafoɔ kora nimdeɛ, na ogyimifoɔ ano yɛ abuo a ɛbɛn.

¹⁵ Ɔdefoɔ ahonyadeɛ ne ne kuro a ɛyɛ den, mmɔborɔfoɔ abuo a ɛbu wɔn ne wɔn hia.

¹⁶ Ɔteneneeni adeyɛ ma nkwa, ɔbɔnefoɔ nnɔbaeɛ deɛ, ɔde yɛ bɔne.

¹⁷Deɛ ɔbu atenetene fa nkwa kwan so, na deɛ ɔpo animka no fom kwan.

¹⁸Deɛ ɔkata nitan soɔ no wɔ atorɔ ano, na deɛ ɔtwirie no yɛ ɔkwasea.

¹⁹Mfomsoɔ mpa ɔkasa dodoɔ mu, na deɛ ɔsianka n’ano yɛ onimdefoɔ.

²⁰Ɔteneneeni tɛkyerɛma yɛ dwetɛ a wɔayiyi mu, abɔnefoɔ akoma deɛ, ɛmfra.

²¹Ɔteneneeni ano yɛne nnipa pii, na agyimifoɔ deɛ, etire a wɔnnie nti wɔwuwu.

²² AWURADE nhyira na ɛyɛ ɔdefoɔ, na ɔmfa awerɛhoɔ nka ho.

²³Amumuyɛ yɛ ɔkwasea sɛ agorɔ, na nyansa yɛ onipa a ɔwɔ nhunumu fɛ.

²⁴ Ɔbɔnefoɔ adeɛ a ɔsuro ara na ɛbɛba ne soɔ, na ateneneefoɔ adeɛ a wɔpɛ no, wɔbɛma wɔn.

²⁵Sɛ ahum tu twam a, na ɔbɔnefoɔ nni hɔ bio, na ɔteneneeni yɛ daa nnyinasoɔ.

²⁶Sɛ nsa kekakeka yɛ ɛse na wisie yɛ aniwa no, sɛ onihafoɔ yɛ wɔn a wɔsoma no ne no.

²⁷ AWURADE suro to nna so, na abɔnefoɔ mfeɛ deɛ, wɔbɛtwa so.

²⁸ Teneneefoɔ anidasoɔ bɛyɛ anigyeɛ, na deɛ abɔnefoɔ hwɛ no kwan no bɛyera.

²⁹ AWURADE akwan yɛ ahoɔden ma pɛyɛfoɔ, na ɛyɛ ɔsɛeɛ ma amumuyɛfoɔ.

³⁰ Ɔteneneeni remfiri n’ananmu da biara da, na abɔnefoɔ deɛ wɔrentena asase so.

³¹ Ɔteneneeni ano yi nyansa adi, na tɛkyerɛma kontonkyi deɛ, wɔbɛtwa.

³²Ɔteneneeni ano nim adeɛ a ɛsɔ ani, na abɔnefoɔ ano di akontonkyisɛm.