Read Twi Asante Mmebusɛm 11 Bible Online

Mmebusɛm 11 - Twi Asante bible

Mmebusɛm 11

¹ Nsisie nsania yɛ AWURADE akyiwadeɛ, na abrammo a ɛtene no yɛ no anisɔ.

² Ahantan ba a, na aniwuo ba, na ahobrɛasefoɔ na nyansa ne wɔn teɛ.

³ Teefoɔ pɛyɛ bɛgya wɔn, na nkontompofoɔ nnaadaa bɛsɛe wɔn.

⁴ Adedodoɔ nyɛ mma hwee abufuo da, na tenenee gye onipa firi owuo mu.

⁵Pɛyɛfoɔ tenenee bɛtene ne kwan, na ɔbɔnefoɔ deɛ ɔbɛhwe ase n’abɔnefosɛm mu.

⁶Teefoɔ tenenee bɛgye wɔn, na nkontompofoɔ deɛ mmusubɔ mu na wɔbɛkye wɔn.

⁷ Onipa bɔne wu a, n’anidasoɔ yera, na amumuyɛfoɔ kwanhwɛ yera.

⁸ Wɔbɛyi ɔteneneeni afiri ahohiahia mu, na ɔbɔnefoɔ abɛsi n’ananmu ahunu amane.

⁹Ɔdebɔneyɛni de n’ano sɛe ne yɔnko, na teneneefoɔ nimdeɛ na wɔde bɛyi wɔn.

¹⁰Teneneefoɔ di yie a, ɔman ho sane wɔn, na abɔnefoɔ sɛe a, wɔhuro.

¹¹ Ɛnam teefoɔ nhyira so na wɔma kuro soɔ, na ɛnam abɔnefoɔ anomu nsɛm so na wɔbɔ no.

¹²Deɛ ɔyi ne yɔnko ahi nni ti, na nhunumu nipa mua n’ano.

¹³Nsekuni nenam yi ahuntasɛm adi, na nokorɛ honhom kata asɛm so.

¹⁴Deɛ akwankyerɛ nnie no, ɔman hwe ase, na ɔmannwoeɛ wɔ agyinatufoɔ dodoɔ mu.

¹⁵ Deɛ ɔdi hɔhoɔ agyinamu no, ɛbɛwie no bɔne, na deɛ ɔtane agyinamudeɛ no aso mu dwo no.

¹⁶Ɔbaa a n’anim teɛ nya animuonyam, na ɔhoɔdenfoɔ deɛ ɔnya ahonyadeɛ kwa.

¹⁷Ɔyamyiefoɔ yɛ ne kra yie, na otirimuɔdenfoɔ ha ɔno ara ne honam.

¹⁸Ɔbɔnefoɔ yɛ adwuma hunu, na deɛ ɔgu tenenee no nya nokorɛ akatua.

¹⁹ Deɛ ɔtim tenenee mu no kɔ nkwa mu, na deɛ ɔti bɔne no nya owuo.

²⁰AWURADE akyiwadeɛ ne akoma kontonkyifoɔ, na wɔn a wɔn kwan yɛ pɛ sɔ n’ani.

²¹Ampa ara, ɔbɔnefoɔ renni bem. Na teneneefoɔ asefoɔ deɛ, wɔbɛgye wɔn.

²² Sɛ sika adwinneɛ teɛ wɔ prako hwene mu no, sɛ ɔbaabereɛ a wapo deɛ ɛfata teɛ ne no.

²³ Teneneefoɔ adeɛ a wɔpɛ yɛ papa nko ara, na abɔnefoɔ deɛ anidasoɔ dane wɔn abufuo.

²⁴Obi wɔ hɔ a ɔpete, nanso ɔkɔ so dɔre ara, na obi di adɔna tra so, nanso ɛhia no ara.

²⁵ Nhyira kra bɛdɔre sradeɛ, na deɛ ɔma ebinom meeɛ nso bɛmee.

²⁶Deɛ ɔkora aburoo no, nkurɔfoɔ dome no, na nhyira ba deɛ ɔtɔn no so.

²⁷Deɛ ɔpɛ papa akyiri kwan no hwehwɛ anisɔ, na deɛ ɔdi bɔne akyire no, ɛba ne so.

²⁸ Deɛ ɔde ne ho to n’ahonyadeɛ soɔ no bɛhwe ase, na ateneneefoɔ bɛyɛ frɔmfrɔm sɛ ahahan.

²⁹Deɛ ɔha ne fie bɛdi mframa, na ogyimifoɔ bɛyɛ akoma mu nyansafoɔ akoa.

³⁰ Ɔteneneeni aba yɛ nkwa dua, na onyansafoɔ deɛ ɔnya akra.[1]

³¹ Hwɛ, sɛ wɔtua ɔteneneeni ka asase so a, na nkantom ɔbɔnefoɔ ne omumuyɛfoɔ.