Read Twi Asante Mmebusɛm 15 Bible Online

Mmebusɛm 15 - Twi Asante bible

Mmebusɛm 15

¹ Mmuaeɛ bɔkɔɔ sianka anibereɛ, na asɛmdenden hwanyan abufuo mu.

² Anyansafoɔ tɛkyerɛma ma nimdeɛ yɛ dɛ, na nkwaseafoɔ ano woro agyimisɛm.

³AWURADE ani wɔ mmaa nyinaa rehwɛ abɔnefoɔ ne apapafoɔ.

⁴Tɛkyerɛmabereɛ yɛ nkwa dua, na emu kyea yɛ honhom mu mmubuiɛ.

⁵ Ogyimifoɔ bu n’agya atenetene animtia, na deɛ ɔbu nkaanim no ani bɛte.

⁶Ɔteneneeni fie wɔ ahodeɛ pii, na ɔbɔnefoɔ nnɔbaeɛ mu wɔ anitane.

⁷Anyansafoɔ ano pete nimdeɛ, na nkwaseafoɔ akoma deɛ ɛntim.

⁸ Abɔnefoɔ afɔdeɛ yɛ AWURADE akyiwadeɛ, na teefoɔ mpaebɔ deɛ ɛyɛ n’anisɔdeɛ.

⁹ Ɔbɔnefoɔ kwan yɛ AWURADE akyiwadeɛ, na deɛ ɔdi tenenee akyi na ɔdɔ no.

¹⁰ Ntea a emu yɛ den wɔ hɔ ma deɛ ɔpo ɔkwan no, na deɛ ɔkyiri animka no bɛwu.

¹¹ Asamando ne ɔsɛeɛ amena wɔ AWURADE anim, na nkantom nnipa mma akoma.

¹² Ɔfɛdifoɔ nnɔ deɛ ɔka n’anim, ɔnkɔ anyansafoɔ nkyɛn.

¹³ Anigyeɛ akoma ma anim te, na akoma mu awerɛhoɔ bubu honhom.

¹⁴Nhunumufoɔ akoma hwehwɛ nimdeɛ, na nkwaseafoɔ ano di agyimisɛm.

¹⁵ Ɔmanehunufoɔ nna nyinaa yɛ bɔne, na akoma pa te sɛ daa apontoɔ.

¹⁶ AWURADE suro mu ade ketewa yɛ sene ahodeɛ pii a ɔhaw bata ho.

¹⁷Ɛfan aduane a ɔdɔ wɔ mu yɛ sene nantwie a wadɔ na ɔtane wɔ mu.

¹⁸ Obufufafoɔ hwanyan ntɔkwa mu, na abodwokyɛrefoɔ pata akayɛ.

¹⁹ Onihafoɔ kwan te sɛ nkasɛɛ ban, na teefoɔ kwan yɛ petee.

²⁰ Ɔba nyansafoɔ ma n’agya ani gye, na onipa kwasea deɛ ɔbu ne na animtia.

²¹Agyimisɛm yɛ anigyeɛ ma deɛ ɔnni tire, na nhunumu nipa tene ne nanteɛ.

²² Wɔkwati agyinakorɔ a, tirimbɔ yɛ ɔkwa, na agyinatufoɔ pii mu na ɛbɛgyina.

²³Onipa anomu mmuaeɛ yɛ anigyeɛ ma no, na asɛm a wɔka no ne berɛ mu, sɛdeɛ ɛsi yɛ!

²⁴Nkwa kwan kɔ ɔsoro ma onimdefoɔ, na wakwati Asamando a ɛwɔ aseɛ no.

²⁵AWURADE dwiri ahantanfoɔ fie, na ɔma okunafoɔ hyeɛ tim.

²⁶Ɔbɔne adwene yɛ AWURADE akyiwadeɛ, na nsɛm a ɛyɛ dɛ ho te.

²⁷ Amim mu mfasopɛfoɔ sɛe ne fie, na deɛ ɔkyiri akyɛdeɛ bɛtena ase.

²⁸Ɔteneneeni akoma dwene mmuaeɛ ho, na abɔnefoɔ ano woro nsɛmmɔne.

²⁹ AWURADE ne abɔnefoɔ ntam ware, na ateneneefoɔ mpaebɔ deɛ, ɔtie.

³⁰ Aniwa so teɛ ma akoma tɔ yam, atesɛm pa deɛ ɛma nnompe mu dɔre sradeɛ.

³¹Aso a ɛtie nkwa animka no, ɛbɛtena anyansafoɔ mu.

³² Deɛ ɔgyaa atenetene mu po ne kra, na deɛ ɔtie animka no nya akoma.

³³ AWURADE suro ne nyansa atenetene, na ahobrɛaseɛ di animuonyam anim.