Read Twi Asante Mmebusɛm 16 Bible Online

Mmebusɛm 16 - Twi Asante bible

Mmebusɛm 16

¹Akoma mu nhyehyɛɛ yɛ onipa dea, na tɛkyerɛma mmuaeɛ firi AWURADE.

² Onipa akwan nyinaa so te n’ani so, na ahonhom karifoɔ ne AWURADE.

³ Fa wo nnwuma hyɛ AWURADE nsa, na wo nhyehyɛɛ bɛtim.

⁴AWURADE yɛ ade nyinaa ma botaeɛ bi nti, ɔbɔnefoɔ mpo ma da bɔne.

⁵ Obiara a ɔyɛ akoma mu dwɛɛ yɛ AWURADE akyiwadeɛ, ampa ara, ne ho renyɛ tɔtorɔtɔɔ.

⁶Wɔde adɔeɛ ne nokorɛ kata amumuyɛ so, na wɔde AWURADE suro kwati bɔne.

⁷ Sɛ onipa akwan sɔ AWURADE ani a, ɔma n’atamfo mpo ne no ntam ba asomdwoeɛ.

⁸ Tenenee mu ade ketewa yɛ sene nnɔbaeɛ pii a ɛmfiri tenenee mu.

⁹ Onipa akoma na ɛdwene ne kwan ho, na AWURADE na ɔsisi n’anammɔn.

¹⁰Nkɔmhyɛ wɔ ɔhene anomu, atemmuo mu nso n’ano mfom.

¹¹ Abrammoɔ ne nsania tee yɛ AWURADE dea, fotoɔ mu aboɔ nyinaa yɛ ne nnwuma.

¹² Ahemfo akyiwadeɛ ne abɔnefosɛm die, na tenenee mu na akonnwa tim.

¹³Ahemfo anisɔdeɛ ne ano tenenee, na deɛ ɔka deɛ ɛtene no, wɔdɔ no.

¹⁴ Ɔhene anibereɛ yɛ owuo abɔfoɔ, na ɔba nyansafoɔ pata no.

¹⁵ Ɔhene animteɛ mu na nkwa wɔ, na n’anisɔ te sɛ bereamporɔberɛ mu mununkum.

¹⁶ Sɛdeɛ nyansanya yɛ sene sika fa! ne nhunumunya sɛ wɔyi sene dwetɛ.

¹⁷Teefoɔ tempɔn ne bɔne kwatie, deɛ ɔhwɛ ne kwan kora ne kra.

¹⁸ Ahantan di ɔsɛeɛ anim, na dwɛɛ honhom di asehweɛ kan.

¹⁹Ɛyɛ sɛ wo ne mmɔborɔfoɔ nya ahobrɛaseɛ honhom sene sɛ wo ne ahokyerɛfoɔ bɛkyɛ asadeɛ.

²⁰Deɛ ɔdwene asɛm soɔ no hunu papa, na nhyira ne deɛ ɔde ne ho to AWURADE soɔ.

²¹Wɔfrɛ akoma mu nyansafoɔ sɛ nhunumufoɔ, na ano dɛdɛ ma adenim dɔ.

²² Nimdeɛ yɛ nkwa nsutire ma deɛ ɔwɔ, na agyimifoɔ deɛ, wɔn asotwe ne wɔn agyimisɛm.

²³Onyansafoɔ akoma kyerɛ n’ano nimdeɛ, na ɛma adenim dɔ wɔ n’anomu.

²⁴ Nsɛm a ɛyɛ dɛ yɛ ɛwoɔkyɛm, ɔkra adɔkɔdɔkɔwadeɛ ne nnompe nkwahosan.

²⁵ Ɛwɔ ɔkwan bi a ɛtene wɔ onipa ani soɔ, na mmom n’awieeɛ yɛ owuo kwan.

²⁶ Odwumayɛni kɔm yɛ adwuma ma no, ɛfiri sɛ n’ano piapia no.

²⁷Obusuyɛfoɔ bɔre bɔne, na n’ano te sɛ ogya a ɛhyehyeɛ.

²⁸ Onipa kontonkyi hyɛ takrawɔgyam, na asomsɛmkani tete nnamfo ntam.

²⁹ Omimdifoɔ sisi ne yɔnko, na ɔde no fa kwan a ɛnyɛ so,

³⁰ ɔmua n’ani dwene akontonkyisɛm ho, ɔwe n’ano wie bɔneyɛ.

³¹ Abotire a ɛyɛ fɛ ne ɛdwono, wɔhu no tenenee kwan so.

³² Deɛ ne bo kyɛre fuo no yɛ sene dɔmmarima, na deɛ ɔdi ne honhom soɔ no sene deɛ ɔko fa kuro.

³³Srɛ so na wɔtwe tonto, na atemmuo nyinaa firi AWURADE.